అయ్యారే అయ్యర్.. ఇదెక్కడి ఫీల్డింగ్? ఆమెకిచ్చి పెళ్లి చేస్తాం!

టీమిండియాలో స్థానాన్ని పదిలం చేసుకోవడానికి ప్రయత్నిస్తోన్న యువ ఆటగాడు శ్రేయస్ అయ్యర్ ఫీల్డింగ్ తప్పిదాలు భారత్‌కు శరాఘాతంలా మారుతున్నాయి. నాలుగో వన్డేలో డేవిడ్ మిల్లర్ క్యాచ్ వదిలేసిన అయ్యర్.. ఐదో వన్డేలో మర్కరమ్ ఇచ్చిన సులువైన క్యాచ్‌ను నేలపాలు చేశాడు. బ్యాటింగ్‌లో ఫర్వాలేదు అనిపిస్తున్నప్పటికీ.. అతడి ఫీల్డింగ్ మాత్రం తీసి కట్టుగా ఉంది. దీంతో అతడు అంతర్జాతీయ క్రికెట్‌కు సరిపోడనే భావన వ్యక్తం అవుతోంది.

ఇన్నింగ్స్ ఆరో ఓవర్లో అయ్యర్ క్యాచ్ వదిలేయడంతో ఊపిరి పీల్చుకున్న మర్కరమ్ ధాటిగా ఆడాడు. భువీ లక్ష్యంగా షాట్లు ఆడాడు. భువనేశ్వర్ విసిరిన ఇన్నింగ్స్ ఏడో ఓవర్లో ఫోర్, సిక్సర్ బాదిన అతడు.. 9వ ఓవర్లో రెండు ఫోర్లు కొట్టాడు. దీంతో సౌతాఫ్రికా వికెట్ నష్టపోకుండా 50 పరుగులు చేసింది. ఈ దశలో బుమ్రా బౌలింగ్‌లో కోహ్లికి క్యాచ్ ఇచ్చిన మర్కరమ్ పెవిలియన్ చేరాడు. అనంతరం డుమిని(1), డివిలియర్స్‌ (6)ను పాండ్య పెవిలియన్ చేర్చాడు. దీంతో సౌతాఫ్రికా 15 ఓవర్లలో3 వికెట్ల నష్టానికి 74 పరుగులు చేసింది.

వరుసగా రెండు మ్యాచ్‌ల్లో రెండు క్యాచ్‌లు వదిలేసిన అతడికి మరో మ్యాచ్‌లో ఛాన్స్ ఇవ్వొద్దని అభిమానులు సూచిస్తున్నారు. అయ్యర్‌కు లావుగా ఉన్న సౌతాఫ్రికా సెక్యూరిటీ ఆఫీసర్‌ను ఇచ్చి పెళ్లి చేయాలని కొందరు పంచ్‌లు వేస్తున్నారు. అతణ్ని ట్రైనింగ్ క్యాంప్‌కి పంపాలని సూచిస్తున్నారు.