సైనా, సింధు మధ్య పోలికేంటి..?: కోచ్ గోపీచంద్

భారత బ్యాడ్మింటన్ స్టార్ క్రీడాకారిణులు పి.వి.సింధు, సైనా నెహ్వాల్‌ మధ్య పోలికలు తీసుకురావొద్దని జాతీయ బ్యాడ్మింటన్ చీఫ్ కోచ్ పుల్లెల గోపీచంద్ సూచించారు. ఇటీవల ముగిసిన ప్రపంచ బ్యాడ్మింటన్ ఛాంపియన్‌షిప్‌లో పీవీ సింధు రజతం గెలుపొందగా.. సైనా నెహ్వాల్ కాంస్య పతకం దక్కించుకున్న విషయం తెలిసిందే. ఈ టోర్నీ అనంతరం సైనా నెహ్వాల్ మళ్లీ గోపీచంద్ అకాడమీలోకి మూడేళ్ల తర్వాత పునరాగమనం చేసింది. 2014‌లో ఈ అకాడమీని వదిలిన సైనా అప్పటి నుంచి బెంగళూరులో కోచ్ విమల కుమార్ వద్ద కోచింగ్ తీసుకుంది. ఛాంపియన్స్ ట్రోఫీలో పతకాలు గెలవడం, సైనా నెహ్వాల్ తన అకాడమీకి తిరిగి రావడంపై తాజాగా గోపీచంద్ ఇంటర్వ్యూలో మాట్లాడారు.

‘నేను సైనా నెహ్వాల్‌కి 2004 నుంచి 2014 వరకు కోచింగ్ ఇచ్చాను. సబ్ జూనియర్ లెవల్ నుంచే సైనా చాలా టోర్నీమెంట్లలో గెలుపొందింది. అంతర్జాతీయ స్థాయిలో పతకాలు సాధించి భారత బ్యాడ్మింటన్‌‌లో తన‌దైన ముద్ర వేయగలిగింది. తనే.. యువ క్రీడాకారులైన పి.వి.సింధు, కశ్యప్, గురుసాయి దత్, అజయ్ జయరాం, ప్రణయ్, ప్రణీత్, కిదాంబి శ్రీకాంత్ తదితరులకి స్ఫూర్తి’ అని కోచ్ వివరించారు. కొంతమంది సైనా నెహ్వాల్, పీవీ సింధు మధ్య పోలిక తేవడంపై గోపీచంద్ అభ్యంతరం వ్యక్తం చేశారు. ‘ఆ ఇద్దరినీ పోల్చడం సమంజసం కాదు. సైనా 2006-2007లోనే కెరీర్ ఆరంభించింది. పీవీ సింధు తనకంటే చాలా చిన్నది. అయితే.. ఇద్దరూ శారీరకంగా మంచి ఫిటెనెస్ ఉన్న క్రీడాకారుణులే. చివరి వరకూ పోరాడుతారే తప్ప అంత సులభంగా ఓటమిని ఒప్పుకోరు. ప్రస్తుతం ఇద్దరూ తమ టార్గెట్స్‌పై దృష్టి పెట్టారు’ అని గోపీచంద్ వెల్లడించారు.