David Warner: సారీ వార్నర్.. నీ కూతురికి కోహ్లి అంటేనే ఇష్టం.. షాకిచ్చిన భార్య

ఆస్ట్రేలియా క్రికెటర్, సన్‌రైజర్స్ హైదరాబాద్ కెప్టెన్ డేవిడ్ వార్నర్‌కు అతడి భార్య క్యాండీస్ వార్నర్ సరదాగా ఓ షాకిచ్చింది. తన రెండో కూతురికి విరాట్ కోహ్లి అంటే ఇష్టమని చెప్పింది. తను రెబల్ అని తెలిపింది. ట్రిపుల్ ఎం సిడ్నీ 104.9 అనే ఎఫ్ఎం రేడియో ఛానెల్‌కు ఇంటర్వ్యూ ఇచ్చిన క్యాండీస్.. ఆసక్తికర విశేషాలను వెల్లడించింది. వార్నర్‌‌తో కలిసి కుటుంబ సభ్యులం ఇంట్లో క్రికెట్ ఆడుతామని తెలిపింది.

వార్నర్ బౌన్సర్లు వేస్తుంటే.. తన పిల్లలు బౌన్సర్లు వద్దు.. స్పిన్ వేయమంటారని క్యాండీస్ తెలిపింది. తమ పిల్లలు కొన్నిసార్లు డాడీలా అవుతామని చెబితే.. మరికొన్నిసార్లు ఫించ్‌లా అవుతామని... ఇంకొన్నిసార్లు కోహ్లిలా అవుతామని అంటారని వార్నర్ భార్య తెలిపింది. తన రెండో కూతురి ఫేవరేట్ క్రికెటర్ విరాట్ కోహ్లి అని తెలిపింది. తండ్రీ కూతుళ్లు ఒకరినొకరు స్లెడ్జింగ్ చేసుకుంటారని క్యాండీస్ నవ్వుతూ చెప్పింది. ఈ వీడియోను ట్రిపుల్ ఎం సిడ్నీ ట్వీట్ చేయగా.. సారీ డేవిడ్ వార్నర్ అంటూ క్యాండీస్ దాన్ని రీట్వీట్ చేసింది.

ఈ ట్వీట్‌కు ఫ్యాన్స్ స్పందిస్తూ.. టీ20ల్లో వార్నర్ విధ్వంసక బ్యాట్స్‌మెన్ అని.. టీ20ల చరిత్రలోనే అతడు దిగ్గజ క్రికెటర్ అని తమ అభిమాన క్రికెటర్‌ను ప్రశంసిస్తున్నారు. టీ20ల్లో వార్నర్‌కు తిరుగులేదని క్యాండీస్‌ ట్వీట్‌కు బదులిస్తున్నారు.

ఐపీఎల్‌లో సన్‌రైజర్స్ హైదరాబాద్ జట్టుకు నాయకత్వం వహిస్తోన్న వార్నర్ 2016లో ఆరెంజ్ ఆర్మీకి టైటిల్ అందించిన సంగతి తెలిసిందే. ఐపీఎల్‌లో 5000 పరుగుల మైలురాయిని చేరుకున్న తొలి విదేశీ క్రికెటర్‌గా రికార్డ్ క్రియేట్ చేసిన వార్నర్.. వరుసగా ఆరు ఐపీఎల్ సీజన్లలోనూ 500కిపైగా రన్స్ చేసిన తొలి ఆటగాడిగానూ రికార్డును సొంతం చేసుకున్నాడు.