Virat Kohli‌ కి ఆసియా కప్ 2022 ముంగిట బూస్ట్.. దాదా సపోర్ట్

టీమిండియా కెప్టెన్ విరాట్ కోహ్లీకి ఆసియా కప్ 2022 (Asia Cup 2022) ముంగిట ఉత్సాహానిచ్చే వార్త. గత కొన్ని రోజులుగా పేలవ ఫామ్‌తో నిరాశపరుస్తున్న విరాట్ కోహ్లీ(Virat Kohli)కి భారత క్రికెట్ నియంత్రణ మండలి (బీసీసీఐ) ప్రెసిడెంట్ సౌరవ్ గంగూలీ (Sourav Ganguly) మద్దతుగా నిలిచాడు. యూఏఈ వేదికగా ఆగస్టు 27 నుంచి ఆసియా కప్ 2022 ప్రారంభంకానుండగా.. ఇంగ్లాండ్ పర్యటన తర్వాత హాలిడే‌కి వెళ్లి కోహ్లీ ఈ మెగా టోర్నీతో జట్టులోకి రీఎంట్రీ ఇవ్వబోతున్నాడు. ఆస్ట్రేలియా గడ్డపై అక్టోబరు- నవంబరులో టీ20 వరల్డ్‌కప్ 2022 కూడా జరగనుండటంతో విరాట్ కోహ్లీ ఫామ్ అందుకోవడం ఇప్పుడు టీమిండియాకి అవసరం. విరాట్ కోహ్లీ, సౌరవ్ గంగూలీ మధ్య గత ఏడాది డిసెంబరు నుంచి కోల్డ్ వార్ నడుస్తోంది. టీ20 వరల్డ్‌కప్ 2021 తర్వాత విరాట్ కోహ్లీ టీ20 కెప్టెన్సీ బాధ్యతల నుంచి తప్పుకోగా.. ఆ తర్వాత కొన్ని రోజులకే వన్డే కెప్టెన్సీ బాధ్యతల నుంచి కూడా కోహ్లీని తప్పించారు. ఆ సమయంలో కోహ్లీని కెప్టెన్‌గా కొనసాగమని తాను రిక్వెస్ట్ చేసినట్లు గంగూలీ చెప్పగా.. తనకి మాట మాత్రం కూడా చెప్పకుండా కెప్టెన్సీ నుంచి తప్పించారని కోహ్లీ ఆరోపించాడు. దాంతో.. కోహ్లీకి షోకాజ్ నోటీసులు పంపేందుకు గంగూలీ సిద్ధమైనట్లు కూడా అప్పట్లో వార్తలు వచ్చాయి. ఆ తర్వాత ఇద్దరూ కలిసింది కూడా చాలా తక్కువ.

విరాట్ కోహ్లీ పేలవ ఫామ్ గురించి తాజాగా సౌరవ్ గంగూలీ మాట్లాడుతూ ‘‘కోహ్లీ‌‌ని ఫస్ట్ మ్యాచ్‌లు ఆడనివ్వండి. అతను టీమిండియాలో బిగ్ ప్లేయర్. భారత్ జట్టు తరఫున ఎన్నో పరుగులు చేశాడు. కచ్చితంగా అతను ఆసియా కప్‌లో ఫామ్ అందుకుంటాడని ఆశిస్తున్నా’’ అని సౌరవ్ గంగూలీ వెల్లడించాడు.