లక్ష్మణ్ ఆటోబయోగ్రఫీ.. ఆ పేరు సరైంది కాదన్న గంగూలీ

‘281 అండ్ బియాండ్’ పేరిట హైదరాబాదీ సొగసరి బ్యాట్స్‌మెన్ వీవీఎస్ లక్ష్మణ్ ఆటోబయోగ్రఫీ మార్కెట్లోకి విడుదలైంది. కోల్‌కతాలో లక్ష్మణ్ ఆటోబయోగ్రఫీని విడుదల చేసిన గంగూలీ ఈ పుస్తకం పేరు సరిగా లేదన్నాడు. ఈ బుక్ పేరు ‘281 అండ్ బియాండ్, అండ్ సేవ్‌డ్ సౌరవ్ గంగూలీ కెరీర్’ అని ఉండాలన్నాడు. ఈడెన్ గార్డెన్స్‌లో లక్ష్మణ్ ఇన్నింగ్స్ కారణంగానే తన కెప్టెన్సీ నిలబడిందని దాదా చెప్పాడు. లక్ష్మణ్ 281 పరుగులు చేయకపోతే ఆ మ్యాచ్ ఓడేవాళ్లమని గంగూలీ తెలిపాడు.

‘తొలి ఇన్నింగ్స్‌లో మేం 171 పరుగులకే ఆలౌటయ్యాం. 274 పరుగుల లోటు ఉండటంతో స్టీవ్ వా ఫాలో ఆన్ ఆడించాడు. ఆ సమయంలో లక్ష్మణ్, ద్రవిడ్ రికార్డ్ స్థాయి భాగస్వామ్యం నెలకొల్పారు. వారిద్దరూ భారత క్రికెట్ గతిని మార్చేశారు. ఈడెన్ విజయం భారత క్రికెట్‌కే కాదు, మాకు కూడా ఎన్నో జీవిత పాఠాలు నేర్పింద’ని దాదా తెలిపాడు.

ఈడెన్ గార్డెన్స్ టెస్టులో 281 పరుగులు చేసిన లక్ష్మణ్.. ద్రవిడ్‌తో కలిసి రికార్డ్ స్థాయిలో 376 పరుగుల భాగస్వామ్యం నెలకొల్పాడు. దీంతో ఆస్ట్రేలియా జైత్రయాత్రకు బ్రేక్ వేసిన గంగూలీ సేన 2-1 తేడాతో సిరీస్ నెగ్గింది.