క్రికెట్‌లోని అన్ని ఫార్మాట్లకీ డుమిని గుడ్‌బై

దక్షిణాఫ్రికా సీనియర్ ఆల్‌రౌండర్ జేపీ డుమిని క్రికెట్‌కి వీడ్కోలు పలికాడు. గత ఏడాది వన్డే ప్రపంచకప్ తర్వాత అంతర్జాతీయ క్రికెట్ నుంచి తప్పుకున్న డుమిని.. ఆ తర్వాత ప్రైవేట్ టీ20 లీగ్స్ ఆడుతూ అభిమానుల్ని అలరిస్తూ వస్తున్నాడు. కానీ.. ఇకపై తాను ఏ ఫార్మాట్‌లోనూ క్రికెట్ ఆడబోనంటూ ప్రకటించేశాడు. దీంతో.. జేపీ డుమిని 15 ఏళ్ల క్రికెట్ కెరీర్ ముగిసింది.

2004, ఆగస్టులో శ్రీలంకతో జరిగిన వన్డే సిరీస్‌తో అంతర్జాతీయ క్రికెట్‌లోకి అరంగేట్రం చేసిన జేపీ డుమిని.. దక్షిణాఫ్రికా తరఫున 46 టెస్టులు, 199 వన్డేలు, 81 టీ20 మ్యాచ్‌లు ఆడాడు. మిడిలార్డర్‌లో నమ్మదగిన బ్యాట్స్‌మెన్‌గా గుర్తింపు పొందిన ఈ ఎడమచేతి వాటం హిట్టర్.. తన స్పిన్ బౌలింగ్‌తోనూ మ్యాచ్‌లను మలుపు తిప్పిన సందర్భాలున్నాయి. అయితే.. యువ క్రికెటర్లకి అవకాశమివ్వాలనే ఉద్దేశంతో తాను క్రికెట్ నుంచి వైదొలుగుతున్నట్లు ఈ 35 ఏళ్ల ఆల్‌రౌండర్ ప్రకటించాడు.

‘నాలో ఇంకా క్రికెట్ ఆడే సత్తా ఉంది. టీ20 మ్యాచ్‌లు ఆడితే..? ఫ్రాంఛైజీలు పెద్ద మొత్తంలో డబ్బులు కూడా ఇస్తాయి. కానీ.. నేను మ్యాచ్‌లు ఆడేందుకు బలమైన కారణంగా నాకు లేదు. కాబట్టి.. అవకాశం కోసం ఎదురుచూస్తున్న యువ క్రికెటర్ల కోసం నేను వైదొలుగుతున్నా’ అని డుమిని వెల్లడించాడు.