జోప్రా ఆర్చర్ బౌన్సర్లకి డికాక్.. 6, 6, 6 (వీడియో)

ఇంగ్లాండ్ సంచలన బౌలర్ జోప్రా ఆర్చర్‌కి దక్షిణాఫ్రికా పర్యటనలో చేదు అనుభవం ఎదురైంది. ఈ ఏడాది వన్డే ప్రపంచకప్.. ఆ తర్వాత యాషెస్ సిరీస్‌లో ప్రత్యర్థి బ్యాట్స్‌మెన్‌లని తన బౌన్సర్లతో వణికించిన జోప్రా ఆర్చర్‌ని.. తాజాగా దక్షిణాఫ్రికా హిట్టర్ డికాక్ వరుస సిక్సర్లతో బెంబేలెత్తించాడు. మ్యాచ్‌లో డికాక్ కొట్టిన సిక్సర్లు అన్నీ ఆర్చర్ బౌలింగ్‌లోనే సాధించడం విశేషం.


సెంచూరియన్ వేదికగా దక్షిణాఫ్రికా, ఇంగ్లాండ్ మధ్య తొలి టెస్టు మ్యాచ్ జరగగా.. డికాక్‌ని బౌన్సర్లతో జోప్రా ఆర్చర్ రెచ్చగొట్టాడు. కొన్ని బౌన్సర్లని సహనంతో డికాక్ ఎదుర్కోగా.. కవ్వింపు ధోరణిలో ఆర్చర్ నోరుజారాడు. దీంతో.. బ్యాటింగ్‌లో రెచ్చిపోయిన డికాక్ తొలి ఇన్నింగ్స్‌లో 95 పరుగులు.. రెండో ఇన్నింగ్స్‌లో 37 బంతుల్లోనే 2x4, 3x6 సాయంతో 34 పరుగులు చేశాడు. ఈ మూడు సిక్సర్లు కూడా ఆర్చర్ బౌలింగ్‌లోనే కొట్టడం విశేషం.


మ్యాచ్‌లో తొలుత బ్యాటింగ్ చేసిన దక్షిణాఫ్రికా జట్టు తొలి ఇన్నింగ్స్‌లో 284 పరుగులకి ఆలౌటవగా.. ఇంగ్లాండ్ టీమ్ మొదటి ఇన్నింగ్స్‌లో పేలవంగా 181 పరుగులకే కుప్పకూలిపోయింది. దీంతో.. 103 పరుగుల ఆధిక్యంతో రెండో ఇన్నింగ్స్ ప్రారంభించిన దక్షిణాఫ్రికా 272 పరుగులకి ఆలౌటైంది. అనంతరం 377 పరుగుల భారీ లక్ష్య ఛేదనకు దిగిన ఇంగ్లాండ్ టీమ్ పోరాడింది. కానీ.. ఆఖరికి 268 పరుగులకే పరిమితమైంది. దీంతో.. 107 పరుగుల తేడాతో సఫారీలు గెలుపొందారు. మ్యాచ్‌లో జోప్రా ఆర్చర్ రెండు ఇన్నింగ్స్‌ల్లో కలిపి 6 వికెట్లు పడగొట్టాడు.