IND vs AUS: ఆస్ట్రేలియాతో టీ20లకి భారత్ జట్టులో ఒక మార్పు

ఆస్ట్రేలియా టూర్‌ ఆరంభానికి ముందే భారత్ జట్టుకి గాయం దెబ్బ తగిలింది. ఐపీఎల్ 2020 సీజన్ ముగిసిన తర్వాత ఆస్ట్రేలియా గడ్డపైకి వెళ్లనున్న టీమిండియా.. అక్కడ నవంబరు 27 నుంచి మూడు వన్డేలు, మూడు టీ20లు, నాలుగు టెస్టుల సిరీస్‌ని ఆడనుంది. ఈ మేరకు మూడు వేర్వేరు జట్లని భారత సెలెక్టర్లు ఇప్పటికే ప్రకటించగా.. తాజాగా టీ20 జట్టులో ఒక మార్పు చేయాల్సి వచ్చింది. టీ20లకి మాత్రమే ఎంపికైన మిస్టరీ స్పిన్నర్ వరుణ్ చక్రవర్తి భుజం గాయం బారిన పడటంతో.. అతని స్థానంలో ఫాస్ట్ బౌలర్ ఎన్. నటరాజన్‌ని సెలెక్టర్లు తాజాగా ఎంపిక చేశారు.

భారత టీ20 జట్టు: విరాట్ కోహ్లీ (కెప్టెన్), శిఖర్ ధావన్, మయాంక్ అగర్వాల్, కేఎల్ రాహుల్ (వైస్ కెప్టెన్, వికెట్ కీపర్), శ్రేయాస్ అయ్యర్, మనీశ్ పాండే, హార్దిక్ పాండ్య, సంజు శాంసన్ (వికెట్ కీపర్), రవీంద్ర జడేజా, వాషింగ్టన్ సుందర్, యుజ్వేందర్ చాహల్, జస్‌ప్రీత్ బుమ్రా, మహ్మద్ షమీ, నవదీప్ సైనీ, దీపక్ చాహర్, ఎన్. నటరాజన్


తమిళనాడుకి చెందిన వరుణ్ చక్రవర్తి ఐపీఎల్ 2020 సీజన్‌లో కోల్‌కతా నైట్‌రైడర్స్ తరఫున 13 మ్యాచ్‌లు ఆడిన 17 వికెట్లు పడగొట్టాడు. మరీ ముఖ్యంగా.. ఢిల్లీ క్యాపిటల్స్‌తో జరిగిన ఓ మ్యాచ్‌‌లో అతను 20 పరుగులిచ్చి ఏకంగా ఐదు వికెట్లు పడగొట్టగా.. టోర్నీలో అతని ఎకానమీ ఓవర్‌కి 6.84గా ఉంది. దాంతో.. టీ20ల కోసం తొలిసారి అతనికి టీమిండియా నుంచి పిలుపు వచ్చింది. కానీ భుజం గాయం కారణంగా తాజాగా అతడ్ని టీ20 జట్టు నుంచి తప్పించిన భారత సెలెక్టర్లు.. ఫాస్ట్ బౌలర్ నటరాజన్‌ని ఎంపిక చేసినట్లు బీసీసీఐ ఒక ప్రకటనలో తెలిపింది. ఐపీఎల్ 2020 సీజన్‌లో సన్‌రైజర్స్ హైదరాబాద్‌కి ఆడుతూ యార్కర్ల కింగ్‌గా పేరొందిన నటరాజన్‌ టోర్నీలో 16 వికెట్లు పడగొట్టాడు.


టీ20 సిరీస్ షెడ్యూల్
1. తొలి టీ20 మ్యాచ్ డిసెంబరు 4న - మనూక ఓవెల్ (12:30 PM)
2. రెండో టీ20 మ్యాచ్ డిసెంబరు 6న- సిడ్నీ (1:30 PM)
3.మూడో టీ20 మ్యాచ్ డిసెంబరు 8న- సిడ్నీ (1:30 PM)