నార్వే యువతి రేప్ ఆరోపణలు, లంక క్రికెటర్‌పై వేటు

సౌతాఫ్రికాతో జరిగిన టెస్టు సిరీస్‌లో అద్భుత బ్యాటింగ్‌తో అదరగొట్టిన శ్రీలంక ఓపెనర్ దనుష్క కరుణరత్నే చిక్కుల్లో పడ్డాడు. నిబంధనలను ఉల్లంఘించాడనే కారణంతో శ్రీలంక క్రికెట్ బోర్డ్ అతణ్ని సస్పెండ్ చేసింది. గుణతిలక హోటల్ గదిలో అతడి స్నేహితుడు తనను రేప్ చేశాడని నార్వేకు చెందిన ఓ యువతి ఆరోపణలు చేయడంతో బోర్డ్ ఈ నిర్ణయం తీసుకుంది.

కొలంబోలో క్రికెటర్లు బస చేస్తోన్న హోటల్ గదికి గుణతిలక, అతడి స్నేహితుడు కలిసి.. ఆదివారం వేకువ జామున ఇద్దరు నార్వే మహిళలను తీసుకెళ్లారు. శ్రీలంక సంతతికి చెందిన బ్రిటన్ వ్యక్తి అయిన గుణతిలక ఫ్రెండ్ తనను రేప్ చేశాడని.. తర్వాత ఇద్దరు నార్వే మహిళల్లో ఒకరు ఆరోపించారు. దీంతో పోలీసులు అతణ్ని అదుపులోకి తీసుకున్నారు.

నార్వే పర్యాటకురాలి ఫిర్యాదు మేరకు కేసు నమోదు చేసి విచారణ చేపడుతున్నామని పోలీసులు తెలిపారు. గుణతిలకపై ఎలాంటి ఆరోపణలు లేవని పోలీసులు చెప్పారు. మ్యాచ్‌లు జరుగుతున్నప్పుడు అర్ధరాత్రిలోగా హోటల్ రూమ్‌కి చేరుకోవాలి, అతిథులెవరితోనూ గడపొద్దనే నిబంధనను గుణతిలక ఉల్లంఘించాడు. దీంతో లంక క్రికెట్ బోర్డు తమ ఓపెనర్‌పై వేటు వేసింది. విచారణ పూర్తయ్యే వరకు రెండో టెస్టు మ్యాచ్ ఫీజును నిలిపేయాలని బోర్డు నిర్ణయించింది.