ధోనీ.. నిన్ను హీరోని చేసిన శ్రీలంకే మళ్లీ..?

భారత మాజీ కెప్టెన్ మహేంద్రసింగ్ ధోని.. తన ఫామ్‌పై విమర్శలు చెలరేగిన ప్రతిసారి బ్యాట్‌తో సమాధానం చెప్తూ ముందుకు వెళ్తున్నాడు. కానీ.. ఒకప్పటితో పోలిస్తే మ్యాచ్‌ని ఫినిష్ చేయడం, వేగంగా పరుగులు రాబట్టడంలో ధోనీ దూకుడు బాగా తగ్గిపోయిందని అతని గణాంకాలు తేటతెల్లం చేస్తున్నాయి. 2016 ఆరంభం నుంచి ధోనీ కేవలం ఐదు సార్లు మాత్రమే 50+ స్కోరు చేయడమే దీనికి నిదర్శనం. ముఖ్యంగా ఛాంపియన్స్ ట్రోఫీ తర్వాత వెస్టిండీస్ పర్యటనలో ధోనీ చేసిన అతి నెమ్మది అర్ధశతకం చర్చనీయాంశంగా మారింది. గత 16 ఏళ్ల భారత క్రికెట్ చరిత్రలో అంతటి నెమ్మది హాఫ్ సెంచరీ ఏ బ్యాట్స్‌మెన్ చేయలేదు.

2019 ప్రపంచకప్ నేపథ్యంలో శ్రీలంకతో వన్డే సిరీస్‌కి యువ బ్యాట్స్‌మెన్/ వికెట్ కీపర్‌ రిషబ్ పంత్‌కు సెలక్టర్లు అవకాశం ఇస్తారేమోనని అంతా భావించారు. కానీ.. యువరాజ్‌పై వేటు వేసిన సెలక్టర్లు ధోనీపై నమ్మకం ఉంచారు. దీంతో సర్వత్రా విమర్శలు చెలరేగాయి. అయితే.. ధోనీ వర్జినల్ ఆటని ఈ పర్యటనలో మీరే చూస్తారని చీఫ్ సెలక్టర్ ఎమ్మెస్కే ప్రసాద్ తమ ఎంపికపై ధీమా వ్యక్తం చేశారు. 2011 ప్రపంచకప్ ఫైనల్లో శ్రీలంకపై అజేయ ఇన్నింగ్స్‌తో 28 ఏళ్ల తర్వాత భారత్‌కి ప్రపంచకప్ అందించి హీరోగా మారిన ధోనీ.. మళ్లీ అదే జట్టుపై తన స్టామినాని నిరూపించుకోవాల్సిన అవసరం ఏర్పడింది. ఒకవైపు జట్టులో పోటీ.. మరోవైపు విమర్శకుల వాగ్భాణాలకి సమాధానం చెప్పాలంటే ధోనీ ఈ పర్యటనలో బ్యాట్‌ ఝళిపించాల్సిందే. ఆదివారం మధ్యాహ్నం 2.30గంటలకి తొలి వన్డే ప్రారంభంకానుంది.