మూడో రోజు అదరగొట్టిన శ్రీలంక..!

కోల్‌కతా వేదికగా భారత్, శ్రీలంక జట్ల మధ్య జరుగుతున్న తొలి టెస్టులో పర్యాటక జట్టు ఆకట్టుకుంటోంది. తొలి ఇన్నింగ్స్‌లో భారత్‌ను 172 పరుగులకు ఆలౌట్ చేసిన లంక.. మూడో రోజు ఆట ముగిసే సమయానికి 4 వికెట్ల నష్టానికి 165 పరుగులు చేసింది. అంతకు ముందు ఐదు వికెట్ల నష్టానికి 74 పరుగులతో మూడో రోజు ఆట ప్రారంభించిన భారత్ కాసేపటికే అర్ధ సెంచరీ చేసిన పుజారా వికెట్ కోల్పోయింది. తర్వాత లోయర్ ఆర్డర్ ఆదుకోవడంతో 172 పరుగులు చేయగలిగింది.

అనంతరం మొదటి ఇన్నింగ్స్ ప్రారంభించిన శ్రీలంక జట్టు 34 పరుగులకే ఓపెనర్ల వికెట్లు కోల్పోయింది. భువనేశ్వర్ కుమార్ అద్భుతంగా బౌలింగ్ చేసి వీరిని పెవిలియన్ చేర్చాడు. మరో వికెట్ పడితే లంకపై ఒత్తిడి పెరిగేదే. కానీ లాహిరు తిరుమానే (94 బంతుల్లో 51; 8x4), ఏంజెలో మాథ్యూస్ (94 బంతుల్లో 52; 8x4) లంకను ఆదుకున్నారు. ఫీల్డర్ల తప్పిదాలను సద్వినియోగం చేసుకున్న వీరిద్దరూ మూడో వికెట్‌కు 99 పరుగులు జోడించారు. భారీ భాగస్వామ్యం దిశగా సాగుతున్న వీరిని ఉమేశ్ యాదవ్ వరుస ఓవర్లలో అవుట్ చేసి భారత శిబిరంలో ఆనందం నింపాడు.


కుదురుకున్న బ్యాట్స్‌మెన్ వెంట వెంటనే అవుట్ అవడంతో లంక తడబడింది. కానీ కెప్టెన్ దినేష్ చండీమల్ (13 బ్యాటింగ్), నిరోషన్ డిక్వెల్లా (14 బ్యాటింగ్) మరో వికెట్ పడకుండా జాగ్రత్త పడ్డారు. 4 వికెట్ల నష్టానికి 165 పరుగులు చేసిన శ్రీలంక.. మరో ఏడు పరుగులు చేస్తే భారత్ స్కోరును అధిగమిస్తుంది. ఈ తరుణంలో వెలుతురు మందగించడంతో మ్యాచ్‌ను ముందుగానే ముగించారు.

44.5వ ఓవర్లో తొడ కండరాలు పట్టేయడంతో షమీ మైదానం వీడగా.. ఆ ఓవర్లో చివరి బంతిని కోహ్లి వేయడం విశేషం. నాలుగో రోజు భారత బౌలర్లు లంక బ్యాట్స్‌మెన్‌ను ఎంత తొందరగా పెవిలియన్ చేరిస్తే.. ఫలితం తేలే అవకాశాలు అంత మెరుగు అవుతాయి. తొలి ఇన్నింగ్స్‌లో లంక బౌలర్లలో లక్మల్‌కు 4 వికెట్లు దక్కగా.. షనక, పెరెరా తలో రెండు వికెట్లు పడగొట్టారు. పుజారా, షమీ వికెట్లను గామేజ్ తన ఖాతాలో వేసుకున్నాడు. భారత బౌలర్లలో భువీ, ఉమేశ్ చెరో రెండు వికెట్లు తీశారు.