పుజారా 153, రహానే 57.. భారత్ భారీ స్కోరు

గాలె‌లో శ్రీలంకతో జరుగుతున్న తొలి టెస్టులో భారత్ భారీ స్కోరు దిశగా పయనిస్తోంది. 399/3 పరుగుల ఓవర్‌నైట్‌ స్కోరుతో రెండో రోజు ఆట ఆరంభించిన భారత్ ఆదిలోనే రెండు కీలక వికెట్లు కోల్పోయింది. తొలిరోజు ఆట ముగిసే సమయానికి 144 పరుగులతో అజేయంగా నిలిచిన ఛటేశ్వర పుజారా.. రెండో రోజు అదనంగా 9 పరుగులు చేసి ఔటయ్యాడు. 153 వ్యక్తిగత స్కోరు వద్ద ప్రదీప్ బౌలింగ్‌లో కీపర్ డిక్వెల్లాకు క్యాచ్‌ ఇచ్చి పెవిలియన్‌కు చేరాడు.

మరోవైపు అర్థ శతకం పూర్తిచేసిన రహానే (57) కూడా వెనుదిరిగాడు. ఆట 102వ ఓవర్‌లో లహిరు కుమార్ బౌలింగ్‌లో కరుణరత్నేకు చిక్కాడు. దీంతో రెండో రోజు తొలి సెషన్‌లోనే రెండు కీలక వికెట్లు కోల్పోయింది. అయినప్పటికీ భారత్ స్కోరుకొచ్చిన డోకా ఏమీ లేదు. ప్రస్తుతం క్రీజులో రవిచంద్రన్ అశ్విన్ (34), కీపర్ సాహా (6) ఉన్నారు. అశ్విన్ దూకుడు ప్రదర్శిస్తుండగా.. సాహా నెమ్మదిగా ఆచితూచి ఆడుతున్నాడు. 109 ఓవర్లు ముగిసే సరికి భారత్ 5 వికెట్ల నష్టానికి 463 పరుగులు చేసింది.

కాగా, శిఖర్ ధవన్‌తో కలసి రెండో వికెట్‌కు 253 పరుగుల భాగస్వామ్యాన్ని నెలకొల్పిన పుజారా.. రహానేతో కలసి 137 పరుగుల విలువైన భాగస్వామ్యాన్ని నెలకొల్పాడు. తొలి రోజు తేలిపోయిన లంక బౌలర్లు.. రెండో రోజు తొలి సెషన్‌లో మాత్రం పైచేయి సాధించాడు. తొలిరోజు మూడు కీలక వికెట్లు తీసిన ప్రదీప్.. రెండో రోజు పుజారాను బోల్తా కొట్టించాడు. ఇక లహిరు కుమార్ ఒక వికెట్ తీశాడు.