పసికూనపై 310 లక్ష్యాన్ని ఊదేశారు..!

సొంతగడ్డపై శ్రీలంక జోరు కొనసాగుతోంది. జింబాబ్వేతో గురువారం జరిగిన మూడో వన్డేలో ఆ జట్టు 310 పరుగుల లక్ష్యాన్ని అలవోకగా ఛేదించేసి 8 వికెట్ల తేడాతో ఘన విజయాన్ని అందుకుంది. ఓపెనర్ మసకద్జ (111: 98 బంతుల్లో 15x4, 1x6) శతకం బాదడంతో తొలుత బ్యాటింగ్ చేసిన జింబాబ్వే 8 వికెట్ల నష్టానికి 310 పరుగులు చేసింది. అనంతరం ఛేదనలో ఓపెనర్లు డిక్వెల్లా (102: 116 బంతుల్లో 14x4), గుణతిలక (116: 111 బంతుల్లో 15x4, 1x6) శతకాలు కొట్టడంతో శ్రీలంక 47.2 ఓవర్లలోనే 312/2తో విజయాన్ని అందుకుంది.

ఛేదనలో తొలి వికెట్‌కి అభేద్యంగా 37 ఓవర్లలోనే 229 పరుగుల భాగస్వామ్యాన్ని శ్రీలంక ఓపెనర్లు నెలకొల్పారు. దీంతో మ్యాచ్‌పై శ్రీలంక పట్టు బిగించేసింది. కానీ.. 8 పరుగుల వ్యవధిలోనే ఓపెనర్లు ఔటైనా.. తర్వాత కుశాల్ మెండిస్ (28 నాటౌట్), ఉపుల్ తరంగ (44 నాటౌట్: 32 బంతుల్లో 3x4, 2x6) గెలుపు లాంఛనాన్ని పూర్తి చేశారు. తొలి వన్డేలో జింబాబ్వే గెలవగా.. తర్వాత రెండు వన్డేల్లోను గెలిచిన శ్రీలంక ఐదు వన్డేల సిరీస్‌లో 2-1‌తో ఆధిక్యంలో నిలిచింది. నాలుగో వన్డే శనివారం జరగనుంది. ‌