ఫిటెనెస్‌పై శ్రీలంక క్రికెటర్లకి వార్నింగ్..?

ఛాంపియన్స్ ట్రోఫీలో ఘోరంగా విఫలమైన శ్రీలంక క్రికెట్ జట్టుకి ఆ దేశ ప్రభుత్వం నుంచి హెచ్చరికలు జారీ అయ్యాయి. మూడు నెలలలోపు ఫిటెనెస్ సాధించాలని లేకపోతే.. జట్టు నుంచి పక్కకి తప్పించాల్సి ఉంటుందంటూ ఆ దేశ క్రీడల మంత్రి దయసిరి జయశేఖర వార్నింగ్ ఇచ్చాడు. ఇటీవల ముగిసిన ఛాంపియన్స్ ట్రోఫీలో సెమీస్ చేరాలంటే తప్పక గెలవాల్సిన మ్యాచ్‌లో పాకిస్థాన్ కెప్టెన్ సర్ఫరాజ్ ఇచ్చిన సులువైన క్యాచ్‌లను శ్రీలంక ఫీల్డర్లు నేలపాలు చేశారు. ఆటగాళ్లలో సరైన ఫిటెనెస్ లేకపోవడంతోనే ఆ మ్యాచ్‌లో శ్రీలంక ఓటమి చవిచూసిందని ఇప్పటికే విమర్శలు గుప్పించిన క్రీడల మంత్రి తాజాగా హెచ్చరికలు పంపాడు.

‘జింబాబ్వేతో శుక్రవారం నుంచి సిరీస్ మొదలుకాబోతోంది. ఆటగాళ్లకి ఫిటెనెస్ పరీక్ష నిర్వహిస్తే.. ఒక్కరికి కూడా సంతృప్తికరమైన ఫిటెనెస్ స్థాయి లేదు. కానీ.. ఈ సిరీస్‌కి మాత్రం ఆంక్షల్ని సడలిస్తున్నాం. మూడు నెలలలోపు వంద శాతం ఫిటెనెస్ సాధించకపోతే.. జట్టులో చోటు వదులుకోక తప్పదు’ అని మంత్రి హెచ్చరించారు. కొద్ది రోజుల క్రితం క్రీడల మంత్రిని కోతితో పోల్చిన ఫాస్ట్ బౌలర్ మలింగ దాదాపు 80 కిలోల బరువు ఉన్నాడని.. పరీక్షల్లో నిర్దేశించిన సమయంలో పరుగును పూర్తి చేయడంతో పూర్తిగా విఫలమైనట్లు సమాచారం. దీంతో మరీ పేలవ ఫిటెనెస్ కారణంగా అతనికి జింబాబ్వేతో మ్యాచ్‌లో చోటు కష్టమేనని వార్తలు వస్తున్నాయి.