ఎక్కువ చేశాను.. క్షమించండి: స్టీవ్ స్మిత్

ఆస్ట్రేలియా కెప్టెన్ స్టీవ్ స్మిత్ క్షమాపణలు చెప్పాడు. భారత్‌తో జరిగిన నాలుగు టెస్టుల సిరీస్‌లో తాను మితిమీరి ప్రవర్తించానని, సహనం కోల్పోయానని అందకు తనను క్షమించాలని కోరాడు. ధర్మశాలలో ఆస్ట్రేలియాతో జరిగిన ఆఖరి టెస్టులో విజయం సాధించిన భారత్.. సిరీస్‌ను 2-1తో కైవసం చేసుకుంది. మ్యాచ్ అనంతరం స్మిత్ మాట్లాడుతూ.. ‘సిరీస్ మొత్తం చిన్నచిన్న ఘటనలతో చాలా ఆసక్తికరంగా సాగింది. కొన్నిసార్లు నాలోని భావోద్వేగాలను ఆపుకోలేకపోయాను. దానికి నా క్షమాపణలు’ అని అన్నాడు.

తాను ఇప్పటి వరకు ఆడిన గొప్ప టెస్ట్ సిరీసుల్లో ఇదొకటని చెప్పాడు. ఇక్కడి పరిస్థితులను అర్థం చేసుకుని తమ జట్టు భారత్‌కు సవాలు విసరడం నిజంగా అద్భుతమని అన్నాడు. ధర్మశాలలో మూడో రోజు భారత బౌలర్లు బాగా రాణించారని చెప్పాడు. అయితే సిరీస్ మొత్తం ఉమేశ్ యాదవ్ అద్భుతంగా బౌలింగ్ చేశాడని స్మిత్ కొనియాడాడు. కాగా, ఈ సిరీస్‌లో స్మిత్ అద్భుత ప్రదర్శన చేశాడు. సిరీస్‌లో అత్యధిక పరుగులు చేసింది కూడా స్మిత్ కావడం విశేషం. మొత్తం 8 ఇన్నింగ్సుల్లో 499 పరుగులు సాధించాడు. వీటిలో మూడు సెంచరీలు కూడా ఉన్నాయి.

అయితే సిరీస్ ప్రారంభానికి ముందునుంచే మాటల యుద్ధం ప్రారంభించిన ఇరు జట్ల క్రికెటర్లు ఆ తరవాత కూడా దాన్ని కొనసాగించారు. ముఖ్యంగా ఆసీస్ కెప్టెన్ స్టీవ్ స్మిత్, భారత సారథి విరాట్ కోహ్లి తమ నోటికి పనిచెప్పారు. మరోవైపు కోహ్లి భుజానికి అయిన గాయాన్ని గ్లెన్ మ్యాక్స్‌వెల్ వెక్కిరించడం, జడేజాతో ఆసీస్ వికెట్ కీపర్ మాథ్యూ వేడ్ వాగ్వాదం ఇలా సిరీస్ మొత్తం వాడివేడిగా సాగింది. మొత్తానికి తొలి మ్యాచ్ ఓడిపోయినా.. రెండు మ్యాచుల్లో అద్భుత విజయాలు సాధించి తామెంటో నిరూపించింది టీం ఇండియా.