అజ్ఞాతం వీడి.. ఆకట్టుకున్న స్టీవ్ స్మిత్

బాల్ ట్యాంపరింగ్ వివాదం తర్వాత తొలిసారి బ్యాట్ పట్టిన స్మీవ్ స్మిత్ హాఫ్ సెంచరీతో ఆకట్టుకున్నాడు. కెనడాలో నిర్వహించిన ట్వంటీ20 క్రికెట్ మ్యాచ్‌లో టోరోంటో నేషనల్స్ తరఫున ఆడిన స్మిత్ 41 బంతుల్లో 61 పరుగులు చేశాడు. 8 ఫోర్లు, ఒక సిక్స్ బాదిన స్మిత్ స్టంపౌట్‌గా వెనుదిరగ్గా.. ప్రేక్షకులు లేచి చప్పట్లు కొట్టారు. తిరిగి క్రికెట్లోకి అడుగు పెట్టడం పట్ల స్మిత్ ఆనందం వ్యక్తం చేశాడు. తనకు అండగా నిలిచిన ప్రేక్షకులకు ధన్యవాదాలు తెలిపాడు.

దక్షిణాఫ్రికాతో మూడో టెస్టు సందర్భంగా బాల్ ట్యాంపరింగ్ వివాదం చోటు చేసుకున్న సంగతి తెలిసిందే. వార్నర్ సూచనతో బాన్‌క్రాఫ్ట్ బాల్ ట్యాంపరింగ్‌కు పాల్పడుతూ దొరికిపోగా.. క్రికెట్ ఆస్ట్రేలియా దీన్ని తీవ్రంగా పరిగణించింది. బాన్‌క్రాఫ్ట్‌పై 9 నెలలు, కెప్టెన్ స్మిత్, వార్నర్‌లపై ఏడాదిపాటు నిషేధం విధించింది. తర్వాత తీవ్ర కన్నీటి పర్యంతమవుతూ స్మిత్, వార్నర్ క్షమాపణలు చెప్పారు.

దేశవాళీ టోర్నీలు, ఆస్ట్రేలియా వెలుపల టీ20 లీగ్‌లలో ఆడేందుకు అనుమతిస్తూ క్రికెట్ ఆస్ట్రేలియా వీరికి సడలింపునిచ్చింది. దీంతో ఆరు జట్లు పోటీ పడుతున్న కెనడా టీ20 లీగ్‌లో స్మిత్ అడుగుపెట్టాడు.

కివీస్ మాజీ ప్లేయర్ ఆంటోన్ డెవిసిక్ 92 పరుగులతో నాటౌట్‌గా నిలవడంతో వాంకోవర్ నిర్దేశించిన 228 పరుగుల లక్ష్యాన్ని టోరెంటో 19.2 ఓవర్లలో చేధించింది.