కోహ్లితో మాటల యుద్ధానికి దిగండి. కానీ..?

మ్యాచ్ సమయంలో ‘కోహ్లితో మాత్రం మాటల యుద్ధానికి దిగకండి.. అలా చేస్తే కోహ్లి‌ని ఆపడం కష్టం’ వారం రోజుల క్రితం ఆస్ట్రేలియా మాజీ క్రికెటర్ మైకేల్ హస్సీ ఆసీస్ జట్టుకి చేసిన హెచ్చరిక ఇది. కానీ.. తాజాగా ఆస్ట్రేలియా కెప్టెన్ స్టీవ్ స్మిత్ మాత్రం జట్టుకు లాభిస్తుంది అనుకుంటే ఎవరితోనైనా స్లెడ్జింగ్‌కు వెనకాడొద్దని సహచరులకి సూచించాడు. భారత్‌తో ఫిబ్రవరి 23 నుంచి ఆస్ట్రేలియా నాలుగు టెస్టుల సిరీస్‌లో తలపడనుంది. ఈ నేపథ్యంలో స్టీవ్ స్మిత్ మీడియాతో మాట్లాడుతూ.. ‘మైదానంలో భారత్ ఆటగాళ్లపై మాటల యుద్ధానికి దిగాలనుకుంటే వెనకాడకండి. అయితే ఆ స్లెడ్జింగ్ ఆసీస్ జట్టుకు ప్రయోజనం చేకూర్చే విధంగా ఉండాలి’ అని సూచించాడు. ఏది ఏమైనా రానున్న సిరీస్‌లో మెరుగైన ఆటతీరుతోనే భారత్‌పై ఒత్తిడి తెచ్చేందుకు ప్రయత్నిస్తాం అని స్మిత్ స్పష్టం చేశాడు.

సొంతగడ్డపై వరుస విజయాలతో దూసుకెళ్తున్న భారత్‌ను కంగారూలు ఎలా నిలువరిస్తారో చూడాలి. ముఖ్యంగా కెప్టెన్ విరాట్ కోహ్లి వరుసగా నాలుగు టెస్టు సిరీస్‌ల్లో డబుల్ సెంచరీలు బాది సూపర్ ఫామ్‌లో ఉన్నాడు. అతనిపై స్లెడ్జింగ్ మంత్రం వినియోగించద్దంటూ ఇప్పటికే సీనియర్లు చెప్పినా.. స్మిత్ తాజా వ్యాఖ్యలతో కోహ్లిపై కూడా కంగారూలు మాటల యుద్ధానికి దిగబోతున్నారని అర్థమవుతోంది. 2014లో ఆసీస్ మాజీ బౌలర్ మిచెల్ జాన్సన్ మైదానంలో కోహ్లితో గొడవపడటంతో రెచ్చిపోయిన కోహ్లి భారీ శతకంతో అతనికి సమాధానమిచ్చాడు. సీనియర్ల మాటలను పెడచెవిన పెడుతున్న స్మిత్ కెప్టెన్సీలోని ఆసీస్ జట్టు మాటల యుద్ధంతో లాభపడుతుందో.. లేక ప్రశ్చాతపంతో బాధపడుతుందో రానున్న సిరీస్‌లో తేలనుంది.