స్పిన్నర్లు ఇంకా నోబాల్స్ వేయడమేంటి..?

దక్షిణాఫ్రికాతో శనివారం రాత్రి జరిగిన నాలుగో వన్డేలో భారత ఆఫ్ స్పిన్నర్ చాహల్ నోబాల్ వేయడంపై దిగ్గజ క్రికెటర్ సునీల్ గవాస్కర్ మండిపడ్డాడు. ఆ నోబాల్ కారణంగా జీవనదానం లభించడంతో దక్షిణాఫ్రికా హిట్టర్ డేవిడ్ మిల్లర్ కీలక ఇన్నింగ్స్ ఆడి సఫారీ జట్టుని గెలిపించాడని ఆయన గుర్తుచేశాడు. టెక్నాలజీ అందుబాటులో ఉన్న ఈరోజుల్లో.. అదీ స్పిన్నర్ నోబాల్ వేయడంపై పెదవివిరిచిన గవాస్కర్.. మిల్లర్ క్యాచ్‌ని ఫీల్డర్ శ్రేయాస్ అయ్యర్ విడిచిపెట్టడం.. భారత ఆటగాళ్లలో కూడా తొలి మూడు వన్డేల్లో ఉన్న ఉత్సాహం నాలుగో వన్డేలో లేకపోవడం జట్టు ఉదాసీనతని వెల్లడించిందన్నాడు.

‘డివిలియర్స్ ఔటవగానే.. భారత్‌‌ గెలుపు ఖాయమని అంతా అనుకున్నారు. కానీ.. డేవిడ్ మిల్లర్‌‌కి నోబాల్ ద్వారా జీవనదానం లభించడంతో మ్యాచ్ ఒక్కసారిగా దక్షిణాఫ్రికావైపు మళ్లింది. అప్పటి వరకు చాహల్ బౌలింగ్‌ని ఎదుర్కోవడంలో ఇబ్బందిపడుతున్నట్లు కనిపించిన మిల్లర్.. ఆ లైఫ్ తర్వాత ఆత్మవిశ్వాసంతో ఆడాడు. నిజాయతీగా చెప్పాలంటే.. టెక్నాలజీ అందుబాటులో ఉన్న ఈరోజుల్లో ఎవరూ నోబాల్స్ వేయడం లేదు. ఇంకా చెప్పాలంటే.. ఆఫ్‌సైడ్ వైడ్ వేయడాన్ని కూడా తగ్గించేశారు. కానీ.. చాహల్ నోబాల్ వేయడం.. శ్రేయాస్ క్యాచ్ విడిచిపెట్టడం లాంటివి భారత్ జట్టు ఉదాసీనతకి నిదర్శనంగా చెప్పవచ్చు. వరుసగా తొలి మూడు వన్డేల్లో గెలవడంతో ఆ నిర్లక్ష్యం వచ్చిందేమో..?’ అని గవాస్కర్ వివరించాడు.