భారత్‌ని ఓడించింది.. ఆ రెండు షాట్లే

భారత్ జట్టుని రెండు షాట్ల సాయంతోనే ఆదివారం తొలి వన్డేలో ఓడించినట్లు న్యూజిలాండ్ మిడిలార్డర్ బ్యాట్స్‌మెన్ రాస్ టేలర్ వెల్లడించాడు. వాంఖడే వేదికగా జరిగిన ఈ మ్యాచ్‌లో టామ్ లాథమ్ (103 నాటౌట్: 102 బంతుల్లో 8x4, 2x6), రాస్ టేలర్ (95: 100 బంతుల్లో 8x4) నాలుగో వికెట్‌కి అభేద్యంగా 200 పరుగుల భాగస్వామ్యం నెలకొల్పడంతో 281 పరుగుల లక్ష్యాన్ని కివీస్ 4 వికెట్లు కోల్పోయి ఒక ఓవర్‌ మిగిలి ఉండగానే ఛేదించింది. భారత మణికట్టు స్పిన్నర్లు కుల్దీప్ యాదవ్, చాహల్ బౌలింగ్‌ని సమర్థంగా ఎదుర్కోగలిగితే.. మ్యాచ్‌‌ని గెలవచ్చనే ఉద్దేశంతో లాథమ్‌కి తాను కొన్ని సూచనలు చేసినట్లు టేలర్ వివరించాడు.

లక్ష్య ఛేదనలో ఓపెనర్లు మార్టిన్ గప్తిల్ (32), కోలిన్ మన్రో (28), కెప్టెన్ విలియమ్సన్ (6) విఫలమవడంతో కివీస్ 80/3తో ఇబ్బందుల్లో పడింది. ఈ దశలో క్రీజులోకి వచ్చిన లాథమ్‌‌తో స్పిన్నర్లని ఎదుర్కోవడంపై తాను మాట్లాడినట్లు టేలర్ వివరించాడు. ‘కుల్దీప్ యాదవ్, చాహల్‌ లయను దెబ్బతీసి వారిని ఒత్తిడిలోకి నెట్టాలని మ్యాచ్ మధ్యలో లాథమ్, నేను చర్చించుకున్నాం. దీని కోసం స్వీప్‌ షాట్‌ని ఎంచుకోమని తొలుత లాథమ్‌కి సూచించాను. నేను చెప్పినట్లు అతను స్పిన్నర్ల బౌలింగ్‌లో అద్భుతంగా ఆ షాట్స్‌ని ఆడగలిగాడు. క్రీజులో కుదురుకున్నాక.. రివర్స్ స్వీప్‌ కూడా ప్రయత్నించమని చెప్పాను. దీంతో బంతి గమనానికి అనుగుణంగా లాథమ్, నేను స్వీప్, రివర్స్ స్వీప్‌ షాట్స్‌ ఆడుతూ స్పిన్నర్లని ఎదుర్కొని గెలిపించే భాగస్వామ్యం నమోదు చేశాం’ అని టేలర్ వెల్లడించాడు. మ్యాచ్‌లో కుల్దీప్, చాహల్ చెరో 10 ఓవర్లు వేసి ఏకంగా 125 పరుగులు సమర్పించుకున్నారు. ఇందులో చాహల్‌కి ఒక వికెట్ కూడా దక్కకపోగా.. కుల్దీప్ యాదవ్ మాత్రం విలియమ్సన్ వికెట్‌తో సరిపెట్టుకున్నాడు.