ఆస్ట్రేలియా గడ్డపై జనగణమన.. కన్నీళ్లు పెట్టుకున్న బౌలర్ మహ్మద్ సిరాజ్

ఆస్ట్రేలియాతో సిడ్నీ వేదికగా గురువారం ప్రారంభమైన మూడో టెస్టుకి ముందు టీమిండియా ఫాస్ట్ బౌలర్ మహ్మద్ సిరాజ్ ఎమోషనల్ అయిపోయాడు. సంప్రదాయం ప్రకారం మ్యాచ్‌కి ముందు ఇరు దేశాల ఆటగాళ్లు తమ జాతీయ గీతాల్ని మైదానంలో పాడగా.. జనగణమన పాడుతున్న సమయంలో సిరాజ్ కళ్లలో నీళ్లు తిరిగాయి. దాంతో సిరాజ్ పక్కనే నిల్చొని ఉన్న మరో ఫాస్ట్ బౌలర్ జస్‌ప్రీత్ బుమ్రా.. అతడ్ని ఓదార్చే ప్రయత్నం చేశాడు. ఇప్పుడు ఆ వీడియో వైరల్‌గా మారింది.

Read Also: సిడ్నీ టెస్టులో మహిళా అంపైర్.. మ్యాచ్‌కి ముందే వార్నర్‌కి వార్నింగ్


జాతీయ గీతం సమయంలో మహ్మద్ సిరాజ్ ఎమోషనల్ అవడంపై భారత మాజీ క్రికెటర్ వసీమ్ జాఫర్ స్పందించాడు. ‘‘సిడ్నీ స్టేడియంలో క్రికెటర్లని ఉత్సాహాపరిచేందుకు పెద్దగా అభిమానులు కూడా లేరు. అయినా దేశం తరఫున ఆడటం కంటే మంచి ప్రేరణ ఏముంటుంది..? ఒక దిగ్గజ క్రికెటర్ ఓసారి చిన్న మాట చెప్పాడు. స్టేడియంలోని జనాల కోసం కాదు.. దేశం తరఫున ఆడాలని ’’ అని జాఫర్ చెప్పుకొచ్చాడు. నెటిజన్లు కూడా సిరాజ్‌‌ దేశభక్తిని మెచ్చుకుంటూ సోషల్ మీడియాలో పాజిటివ్‌గా స్పందిస్తున్నారు. సిరాజ్ ఆస్ట్రేలియా పర్యటనలో ఉండగానే అతని తండ్రి గౌస్ చనిపోయిన విషయం తెలిసిందే.

Read Also: విరాట్ కోహ్లీకి విరుద్ధ ప్రయోజనాల సెగ.. నోటీసులు తప్పవా..?


మ్యాచ్‌లో టాస్ గెలిచి మొదట బ్యాటింగ్ చేసిన ఆస్ట్రేలియాని ఆరంభంలోనే మహ్మద్ సిరాజ్ దెబ్బతీశాడు. గాయం కారణంగా దాదాపు నెల తర్వాత మళ్లీ ఆస్ట్రేలియా జట్టులోకి రీఎంట్రీ ఇచ్చిన ఓపెనర్ డేవిడ్ వార్నర్ (5: 8 బంతుల్లో)ని ఇన్నింగ్స్ 4వ ఓవర్‌లోనే సిరాజ్ ఔట్ చేసేశాడు. ఆఫ్ స్టంప్‌కి దూరంగా సిరాజ్ విసిరిన బంతిని డ్రైవ్ చేయబోయిన డేవిడ్ వార్నర్.. బంతి బ్యాట్ ఎడ్జ్‌కి తాకడంతో ఫస్ట్ స్లిప్‌లో చతేశ్వర్ పుజారా చేతికి చిక్కాడు.

Read Also: ఆసుపత్రి నుంచి సౌరవ్ గంగూలీ డిశ్చార్జ్.. ఇంటికి వెళ్లినా టచ్‌లోనే