తమిళనాడుని 176కే కుప్పకూల్చిన ఆంధ్రా

రంజీ ట్రోఫీ ఆరంభ మ్యాచ్‌లోనే ఆంధ్రా బౌలర్లు విజృంభించారు. చెపాక్ స్టేడియంలో శుక్రవారం ఆరంభమైన మ్యాచ్‌లో భార్గవ్ భట్ (4/52), పృథ్వీరాజ్‌ (3/39) చెలరేగడంతో మొదట బ్యాటింగ్ చేసిన తమిళనాడు 176 పరుగులకే కుప్పకూలిపోయింది. గాయం కారణంగా చాలా రోజుల తర్వాత మైదానంలోకి వచ్చిన మురళీ విజయ్ (4: 21 బంతుల్లో) తక్కువ స్కోరుకే పెవిలియన్ చేరిపోగా.. ఇటీవల ఇంగ్లాండ్‌లో కౌంటీ మ్యాచ్‌లు ఆడి వచ్చిన రవిచంద్రన్ అశ్విన్ (9: 17 బంతుల్లో) నిరాశపరచడంతో తమిళనాడు ఆరంభంలోనే ఒత్తిడికి గురైంది.

హనుమ విహారీ సారథ్యంలో ఆంధ్రా బౌలర్లు మ్యాచ్ ఆది నుంచే ఆధిపత్య ధోరణితో బౌలింగ్ చేస్తూ వచ్చారు. తమిళనాడు జట్టులో బాబా అపరజిత్ (51: 137 బంతుల్లో 4x4) మాత్రమే అర్ధశతకంతో పరువు నిలిపే ఇన్నింగ్స్ ఆడాడు. 85 ఓవర్లలోనే ఆ జట్టు ఆలౌటవడంతో అనంతరం బ్యాటింగ్‌కి దిగిన ఆంధ్రా జట్టు తొలి రోజు ఆట ముగిసే సమయానికి వికెట్ నష్టపోకుండా 8 పరుగులతో నిలిచింది. ఓపెనర్లు ప్రశాంత్ కుమార్ (1 నాటౌట్), భరత్ (7 నాటౌట్) క్రీజులో ఉన్నారు. హైదరాబాద్, మహారాష్ట్ర మధ్య శుక్రవారం జరగాల్సిన మ్యాచ్‌ వర్షం కారణంగా తొలి రోజు ఒక బంతి కూడా పడలేదు.