Virat Kohli: కోహ్లీ పరిపూర్ణ కెప్టెన్ కాదు: అనిల్ కుంబ్లే

కెప్టెన్‌గా విరాట్‌ కోహ్లీ ఇంకా నేర్చుకునే దశలోనే ఉన్నాడని టీమిండియా మాజీ కోచ్‌, కెప్టెన్‌ అనిల్‌ కుంబ్లే అభిప్రాయపడ్డారు. ఆటగాడిగా అతడు ఎన్నో రికార్డులు సాధించాడు, కానీ కెప్టెన్‌గా మాత్రం ఎన్నో అంశాల్లో మెరుగవ్వాల్సి ఉందని అభిప్రాయపడ్డాడు. ఎంఎస్‌ ధోనీ 2014-15 ఆస్ట్రేలియా పర్యటన తర్వాత రిటైరయ్యాక కోహ్లీ కెప్టెన్‌ అయ్యాడు. వన్డేల్లో 2017 జనవరి నుంచి పరిమిత ఓవర్ల క్రికెట్‌ సారథిగా వ్యవహరిస్తున్నాడు.

ఆస్ట్రేలియా పర్యటనలో ఉన్న టీమిండియా డిసెంబర్‌ 6న తొలి టెస్ట్‌ పెర్త్‌లో ఆడనుంది. ఈ క్రమంలో అనిల్‌ కుంబ్లే మాట్లాడాడు. ‘ఏ కెప్టెన్‌ పరిపూర్ణత సాధించలేడు. ప్రతి పర్యటన నుంచి ఎంతోకొంత నేర్చుకోవాల్సి ఉంటుంది. ముఖ్యంగా కోహ్లీలాంటి దూకుడు స్వభావం ఉన్న కెప్టెన్‌ పరిస్థితులకు అనుగుణంగా వ్యవహరించాల్సి ఉంటుంది. ఇంగ్లాండ్‌, దక్షిణాఫ్రికా లాంటి కఠిన సిరీస్‌ పర్యటనలతో కెప్టెన్సీపై కోహ్లీకి ఓ అభిప్రాయం వచ్చి ఉంటుంది. అయితే ఆసీస్‌ సొంతగడ్డపై ఆడుతున్న విషయాన్ని కోహ్లీ మరవకూడదు. గతంలో వారి లోయర్‌ ఆర్డర్‌ ఆటగాళ్ల కారణంగా భారత్‌ సిరీస్‌లు కోల్పోయింది. ఈ సిరీస్‌లో మాత్రం భారత బౌలింగ్‌ ఆసీస్‌ కంటే పటిష్టంగా ఉంది. ఎలాంటి పొరపాట్లు చేయకపోతే సిరీస్‌ను కోహ్లీ సేన కైవసం చేసుకోవచ్చునని’ కుంబ్లే తన అభిప్రాయాలను షేర్‌ చేసుకున్నాడు.

నాకు తెలిసి ప్రస్తుత పరిస్థితుల్లో బౌలింగ్‌లో ఆసీస్‌ కంటే టీమిండియానే మెరుగ్గా ఉంది. అయితే ఆసీస్‌ లోయర్‌ ఆర్డర్‌ పట్ల టీమిండియా చాలా అప్రమత్తంగా ఉండాలి. ఎందుకుంటే ఇంతకుముందు లోయర్‌ ఆర్డర్‌ బ్యాట్స్‌మెన్స్‌ టీమిండియాను రెండు సార్లు దెబ్బకొట్టారు. మరోసారి ఆ అవకాశం వారికివ్వకూడదు. ఆసీస్‌ సొంత గడ్డపై వారికే ఎక్కువ పరిజ్ఞానం ఉంటుంది. టీమిండియా పిచ్‌ పరిస్థితులను సరిగ్గా అంచనా వేయగలగాలి.వీటన్నింటినీ దృష్టిలో ఉంచుకుంటే గెలవడం టీమిండియాకేమంత కష్టం కాదు’ అని విశ్లేషించారు.