Umesh Yadav Father Death | ఆస్ట్రేలియాతో టెస్టు సిరీస్ ఆడుతున్న భారత జట్టులోని బౌలర్ ఇంట విషాదం

ఆస్ట్రేలియాతో ప్రస్తుతం బోర్డర్- గవాస్కర్ ట్రోఫీలో ఆడుతున్న భారత టెస్టు జట్టులోని ఫాస్ట్ బౌలర్ ఉమేశ్ యాదవ్ (Umesh Yadav) ఇంట విషాదం చోటు చేసుకుంది. గత కొంతకాలంగా అనారోగ్యంతో బాధపడుతున్న ఉమేశ్ యాదవ్ తండ్రి తిలక్ యాదవ్ (74) గురువారం కన్నుమూశారు. భారత్, ఆస్ట్రేలియా (Australia vs India) మధ్య ఇప్పటికే రెండు టెస్టు మ్యాచ్‌లు ముగియగా.. రెండింటిలోనూ టీమిండియానే గెలిచింది. ఇక మూడో టెస్టు మ్యాచ్ ఇండోర్ వేదికగా మార్చి 1 నుంచి ప్రారంభంకానుంది. ఉమేశ్ యాదవ్ తండ్రి గత కొన్ని నెలలుగా అనారోగ్య సమస్యలతో ఇబ్బందిపడుతున్నాడు. ఇటీవల నాగ్‌పూర్‌లోని ఓ ప్రైవేట్ ఆసుపత్రిలో కొన్ని రోజులు చికిత్స కూడా అందించారు. కానీ ఆరోగ్య పరిస్థితి ఏమాత్రం మెరుగవకపోవడంతో కొన్ని రోజుల క్రితం సొంతూరు మాలిక్ చౌక్‌కి తరలించారు. అక్కడ ఈరోజు తిలక్ యాదవ్ తుది శ్వాస విడిచారు. తొలి రెండు టెస్టుల్లో ఉమేశ్ యాదవ్‌కి తుది జట్టులో అవకాశం దక్కలేదు. ఫాస్ట్ బౌలర్లు మహ్మద్ షమీ, మహ్మద్ సిరాజ్‌ని తుది జట్టులో ఆడించిన కెప్టెన్ రోహిత్ శర్మ.. ఉమేశ్ యాదవ్‌ని రిజర్వ్ బెంచ్‌కే పరిమితం చేశాడు.

2010లో భారత్ జట్టులోకి ఎంట్రీ ఇచ్చిన ఉమేశ్ యాదవ్.. గత కొన్ని రోజులుగా కేవలం టెస్టులకే పరిమితమయ్యాడు. కానీ.. టెస్టుల్లోనూ తుది జట్టులో ఈ ఫాస్ట్ బౌలర్‌కి అవకాశాలు దక్కడం లేదు. మార్చి 31 నుంచి ఐపీఎల్ 2023 సీజన్‌లో కోల్‌కతా నైట్‌రైడర్స్ తరఫున ఉమేశ్ యాదవ్ మ్యాచ్‌లు ఆడబోతున్నాడు.

Read Latest Sports News, Cricket News, Telugu News