గుడ్ న్యూస్.. ఫిట్‌నెస్ టెస్టులో పాసైన రోహిత్.. ఆస్ట్రేలియా వెళ్లేది ఆ రోజే!

టీమిండియా ఓపెనర్ రోహిత్ శర్మ ఫిట్‌నెస్ టెస్టులో పాసయ్యాడు. ఐపీఎల్ ఆడుతుండగా.. రోహిత్ తొడ కండరాల గాయం బారిన పడిన సంగతి తెలిసిందే. ఆసీస్‌తో జరిగిన పరిమిత ఓవర్ల సిరీస్‌కు దూరమైన హిట్ మ్యాన్.. బెంగళూరులోని నేషనల్ క్రికెట్ అకాడమీలో నేడు (శుక్రవారం) నిర్వహించిన ఫిట్‌నెస్ టెస్టులో ఉత్తీర్ణుడయ్యాడు. ఎన్‌సీఏ డైరెక్టర్ రాహుల్ ద్రావిడ్ పర్యవేక్షణలో ఈ టెస్టు నిర్వహించారు. ఫిట్‌నెస్ సాధించిన రోహిత్.. టెస్టు సిరీస్ ప్రారంభానికి మూడు రోజుల ముందు డిసెంబర్ 14న ఆస్ట్రేలియా బయల్దేరి వెళ్లనున్నాడు.

డిసెంబరు 17 నుంచి ఆస్ట్రేలియాతో నాలుగు టెస్టుల సిరీస్‌ని టీమిండియా ఆడనుండగా.. రోహిత్ శర్మని కేవలం టెస్టు సిరీస్‌కి మాత్రమే భారత సెలెక్టర్లు ఎంపిక చేసిన విషయం తెలిసిందే. టెస్టు సిరీస్‌కి ఎంపికైన రోహిత్ శర్మ.. చివరి రెండు టెస్టులు మాత్రమే ఆడే అవకాశం ఉంది.

రోహిత్ ఆస్ట్రేలియా పర్యటను రేపే బయల్దేరి వెళ్లినా.. సిరీస్ బయో- సెక్యూర్ వాతావరణంలో జరుగుతుండటంతో.. ఆస్ట్రేలియా గడ్డపై అడుగుపెట్టిన తర్వాత నిబంధనల ప్రకారం అతడు 14 రోజులు క్వారంటైన్‌లో ఉండాలి. ఈ నిబంధనల కారణంగా డిసెంబర్ చివరికి గానీ రోహిత్ శర్మ జట్టుతో చేరలేడు. డిసెంబరు 17 నుంచి 21 వరకూ మొదటి టెస్టు జరగనుండగా.. ఆ తర్వాత డిసెంబరు 26 నుంచి 30 వరకూ రెండో టెస్టు జరగనుంది. క్వారంటైన్ నిబంధనలను సడలించకపోతే.. ఈ రెండు మ్యాచ్‌లకీ హిట్‌మ్యాన్ దూరంగా ఉండే అవకాశాలే ఎక్కువగా ఉన్నాయి.

ఇప్పటికే మయాంక్ అగర్వాల్ టెస్టు ఓపెనర్‌గా ఖాయమవగా.. అతనికి జోడీగా శుభమన్ గిల్ లేదా పృథ్వీ షా తొలి రెండు టెస్టుల్లో భారత్ ఇన్నింగ్స్‌ని ప్రారంభించే అవకాశం ఉంది.