సఫారీలపై తొలిసారి.. మూడో స్థానంలో టీమిండియా

దక్షిణాఫ్రికాతో జరుగుతోన్న తొలి టీ20 మ్యాచ్‌లో ముందుగా బ్యాటింగ్ చేసిన భారత జట్టు నిర్ణీత 20 ఓవర్లలో ఐదు వికెట్ల నష్టానికి 203 పరుగులు చేసింది. ధావన్ 39 బంతుల్లో 72 పరుగులు చేయడంతో టీ20ల్లో సౌతాఫ్రికాపై భారత్ తొలిసారిగా 200+ పరుగులు చేసింది. టీ20ల్లో భారత్ 200కిపైగా పరుగులు చేయడం ఇది తొమ్మిదోసారి. ఈ జాబితాలో టీమిండియా మూడో స్థానంలో ఉంది. దక్షిణాఫ్రికా 11 సార్లు (ఈ మ్యాచ్ ఫలితం తేలక ముందు వరకు), ఆస్ట్రేలియా పదిసార్లు చొప్పున 200కిపైగా పరుగులు సాధించాయి.

తొలి ఓవర్లో బౌండరీలతో విరుచుకుపడిన రోహిత్ (21), చాలా కాలం తర్వాత జట్టులోకి వచ్చిన రైనా (15) భారీ షాట్లు ఆడే క్రమంలో అనవసరంగా అవుటయ్యారు. క్రీజులో ఉన్నంత సేపు వీరు మెరుపులు మెరిపించారు. దీంతో టీమిండియా ఆరు ఓవర్లలో రెండు వికెట్ల నష్టానికి 78 రన్స్ చేసింది. పవర్ ప్లేలో భారత్‌కు ఇదే అత్యధిక స్కోరు కావడం విశేషం.