రిషబ్ పంత్ గన్ ప్లేయర్.. కానీ సపోర్ట్ కావాలి: సురేశ్ రైనా

టీమిండియా యువ వికెట్ కీపర్/ బ్యాట్స్‌మెన్ రిషబ్ పంత్ గన్ ప్లేయర్ అని వెటరన్ బ్యాట్స్‌మెన్ సురేశ్ రైనా కితాబిచ్చాడు. 2019 వన్డే ప్రపంచకప్ తర్వాత భారత్ జట్టుకి ధోనీ దూరమవగా.. అతని స్థానంలో ఈ ఏడాది జనవరి వరకూ సెలక్టర్లు పంత్‌కి వరుసగా అవకాశాలిచ్చారు. కానీ.. పంత్ మాత్రం వాటిని సద్వినియోగం చేసుకోలేకపోయాడు. దాంతో.. ఈ ఏడాది జనవరి నుంచి కేఎల్ రాహుల్‌కి వికెట్ కీపర్/ బ్యాట్స్‌మెన్‌గా టీమ్‌లో చోటు కల్పించగా.. అతను చక్కగా రాణిస్తూ ధోనీ స్థానాన్ని భర్తీ చేయగల సామర్థ్యం ఉన్న ఆటగాడిగా కనిపిస్తున్నాడు.

రిషబ్ పంత్‌ని పక్కన పెట్టడం సరికాదని గతంలోనే చెప్పుకొచ్చిన సురేశ్ రైనా.. తాజాగా అతనికి టీమిండియా నుంచి సపోర్ట్‌ కూడా అవసరమని వెల్లడించాడు. ‘‘రిషబ్ పంత్ గన్ ప్లేయర్. అతనికి మంచి భవిష్యత్ ఉంది. అయితే.. టీమిండియాలోని సహచరుల నుంచి అతనికి కాస్త సపోర్ట్ కావాలి. ఆ మద్దతు లభిస్తే..? తప్పకుండా అతని నుంచి మెరుగైన ఇన్నింగ్స్‌లు వచ్చే అవకాశం ఉంది. ఐపీఎల్‌లో నిలకడగా రాణిస్తున్న పంత్.. టెస్టుల్లో ఇప్పటికే రెండు సెంచరీలు నమోదు చేశాడు. అలానే వన్డే, టీ20ల్లోనూ అతను బాగానే ఆడుతున్నాడు’’ అని రైనా వెల్లడించాడు.

2018‌లో ఇంగ్లాండ్ గడ్డపై టెస్టు సెంచరీ నమోదు చేసిన రిషబ్ పంత్.. అదే ఏడాది ఆస్ట్రేలియా పర్యటనలోనూ శతకం బాదాడు. కానీ.. వన్డే, టీ20ల్లో మాత్రం శతకం అతనికి అందని ద్రాక్షగా కనిపిస్తోంది. ఇక ఐపీఎల్ 2020 సీజన్ యూఏఈ వేదికగా సెప్టెంబరు 19 నుంచి నవంబరు 10 వరకూ జరగనుండగా.. ఢిల్లీ క్యాపిటల్స్ తరఫున పంత్ ఆడబోతున్నాడు. ఈ సీజన్‌లో మెరుగైన ప్రదర్శన కనబర్చగలిగితే..? టీమిండియాలో మళ్లీ రెగ్యులర్‌ ఆటగాడిగా అతను మారే అవకాశం ఉంది. మరోవైపు రైనా.. గత రెండేళ్ల నుంచి భారత్ జట్టుకి దూరంగా ఉంటున్న విషయం తెలిసిందే.