యాప్నగరం

రైలు కోచ్, అరటి పండ్లు.. వరల్డ్ కప్ కోసం ఆటగాళ్ల కోరికల చిట్టా!

వెంట భార్యలను తీసుకెళ్లే అవకాశం కల్పించాలి, ప్రత్యేకంగా ఓ రైలు కోచ్ బుక్ చేయండి, కొన్ని అరటి పండ్లు తప్పనిసరి.. వరల్డ్ కప్ టూర్ కోసం భారత ఆటగాళ్లు సీఓఏ ముందు ఉంచిన కొన్ని డిమాండ్లు ఇవి.

Samayam Telugu 30 Oct 2018, 3:27 pm
ప్రపంచ కప్ గడువు సమీపిస్తోన్న తరుణంలో టీమిండియా తమ డిమాండ్లను కమిటీ ఆఫ్ అడ్మినిస్ట్రేటర్స్‌ (సీఓఏ) ముందు ఉంచింది. భార్యలను వెంట తీసుకెళ్లే అవకాశం కల్పించాలని, ఓ రైలు కోచ్ కావాలని, అరటి పండ్లు కావాలని హైదరాబాద్‌లో జరిగిన సీఓఏ రివ్యూ మీటింగ్‌‌కు భారత ఆటగాళ్ల నుంచి వినతులు అందాయి. ఇటీవలే భారత జట్టు ఇంగ్లాండ్ పర్యటనను ముగించుకొని వచ్చిన నేపథ్యంలో.. అక్కడ ఎదురైన అనుభవాలను దృష్టిలో ఉంచుకొని.. వరల్డ్ కప్ సమయంలో ఇంగ్లాండ్‌లో తమకేం కావాలో ఆటగాళ్లు తెలిపారు.
Samayam Telugu kohli7


గత పర్యటనలో ఇంగ్లాండ్ క్రికెట్ బోర్డ్ భారత ఆటగాళ్లు కోరిన పండ్లను అందించలేక పోయింది. దీంతో తమకు ఈసారి అరటి పండ్లు కావాలని వారు సీఓఏను డిమాండ్ చేశారు. దీనికి కమిటీ బదులిస్తూ.. ఈ విషయాన్ని టీం మేనేజర్‌కు చెప్పి బోర్డు ఖర్చులతో అరటి పండ్లు కొనుగోలు చేయాలని చెప్పినట్టు సమాచారం.

మంచి జిమ్ సౌకర్యం ఉన్న హోటల్స్‌ను బుక్ చేయాలని, భార్యలను వెంట తీసుకెళ్లేందుకు అనుమతివ్వాలని ఆటగాళ్లు కోరారు. విండీస్‌తో టెస్టు సిరీస్ ప్రారంభానికి ముందు జరిగిన రివ్యూ మీటింగ్‌లో కోహ్లి, రహానే, రోహిత్ శర్మ, కోచ్ రవిశాస్త్రితోపాటు సెలక్షన్ కమిటీ చైర్మన్ ఎమ్మెస్కే ప్రసాద్ పాల్గొన్నారు.

వరల్డ్ కప్ సమయంలో రైలు ప్రయాణం వల్ల సమయం ఆదా అవుతుందని చెప్పిన ఆటగాళ్లు, తమకు ప్రత్యేకంగా ఓ బోగీని బుక్ చేయాలని కోరారు. కానీ అభిమానుల కారణంగా ఇబ్బందులు తలెత్తే అవకాశం ఉందని, భద్రతాపరమైన సమస్యలు ఎదురవుతాయని సీఓఏ అభిప్రాయపడింది. ఇంగ్లాండ్ జట్టు కూడా రైల్లోనే ప్రయాణిస్తుందని క్రికెటర్లు సీఓఏకి తెలిపారు. ఏదైనా జరగరానిది జరిగితే సీఓఏకి గానీ బీసీసీఐకి గానీ సంబంధం లేదనే నిబంధనతో సీఓఏ ఇందుకు అంగీకరించింది.

వచ్చే నెలలో భారత జట్టు ఆస్ట్రేలియా పర్యటనకు వెళ్లనుంది. అక్కడ అధికారిక టీం బస్సులో ఆటగాళ్లతోపాటు భార్యలు ప్రయాణించడానికి సీఓఏ అంగీకరించలేదు. వారి కోసం ప్రైవేట్ బస్సు ఏర్పాటు చేస్తామని తెలిపింది. గత పర్యటనల సమయంలో కొందరు ఆటగాళ్లు భార్యలతో కలిసి వేర్వేరుగా ప్రయాణించే వారు. ఇలా చేయడం వల్ల జట్టులోని ఆటగాళ్ల మధ్య సమన్వయం కొరవడుతుందని సీఓఏ భావించింది.

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.