తిరిమాన్నె రెండేళ్ల కష్టాలు తీర్చిన సాటి లెఫ్ట్ హ్యాండర్!

కోల్‌కతా టెస్టులో తొలి ఇన్నింగ్స్‌లో అష్ట కష్టాలు పడి భారత్ 172 పరుగులు చేసింది. బదులుగా మూడో రోజు ఆట ముగిసే సమయానికి శ్రీలంక 4 వికెట్ల నష్టానికి 165 పరుగులు చేసి భారీ స్కోరు దిశగా సాగుతోంది. ఈ మ్యాచ్‌లో 34 పరుగులకే భువీ లంక ఓపెనర్లను పెవిలియన్ చేర్చి భారత్‌కు శుభారంభం ఇచ్చాడు. కానీ తర్వాత లాహిరు తిరిమాన్నె, ఏంజెలో మాథ్యూస్ అర్ధ శతకాలతో ఆదుకున్నారు. మూడో వికెట్‌కు 99 పరుగులు జోడించారు. దీంతో లంక కోలుకుంది. మళ్లీ ఉమేశ్ యాదవ్ వరుస ఓవర్లలో వీరిద్దర్నీ పెవిలియన్ చేర్చే వరకు ఆధిపత్యం చెలాయించింది.

వాస్తవానికి ఈ మ్యాచ్‌లో తిరిమాన్నె ఇచ్చిన ఈజీ క్యాచ్‌ను శిఖర్ ధావన్ వదిలేశాడు. 27 పరుగుల వద్ద అవుట్ కావాల్సినవాడు 8 ఫోర్లతో 51 పరుగులు చేశాడు. లేకుంటే పరిస్థితి మరోలా ఉండేది. ఇక్కడ ముఖ్యంగా చెప్పుకోవాల్సిన విషయం ఏంటంటే.. తిరిమాన్నె అర్ధసెంచరీ సాధించడం 2015 తర్వాత ఇదే తొలిసారి. ఆ ఏడాది ఆగష్టు చివరి వారంలో కొలంబో టెస్టు తొలి ఇన్నింగ్స్‌లో భారత్‌పై ఈ లెఫ్ట్ హ్యాండ్ బ్యాట్స్‌మెన్ 269 బంతులు ఎదుర్కొని 62 పరుగులు చేశాడు. ఆ తర్వాత మళ్లీ ఇప్పటి దాకా 13 టెస్ట్ ఇన్నింగ్స్ ఆడాడు. అర్ధ సెంచరీ కాదు కదా.. పాతిక పరుగులు కూడా చేయలేకపోయాడు. గత ఏడాది లీడ్స్‌లో ఇంగ్లండ్‌పై చేసిన 22 పరుగులే అత్యధికం.

టెస్టు క్రికెట్లో నిలదొక్కుకోవడానికి రెండేళ్లుగా తీవ్ర ఇబ్బందులు ఎదుర్కొంటున్న తిరిమాన్నె ధావన్ పుణ్యామని మళ్లీ అర్ధ సెంచరీతో ఫామ్‌లోకి వచ్చాడు. ఇటీవలి కాలంలో తన అతిపెద్ద సమస్యను పరిష్కరించుకోవడంలో సహకరించిన తోటి ఎడమ చేతి వాటం బ్యాట్స్‌మెన్‌కు తిరిమాన్నె థ్యాంక్స్ చెప్పాల్సిందే.