తిడితే విని కూర్చునే టీమ్ కాదక్కడ.. ‘కోహ్లి’..!

ప్రత్యర్థి జట్టు పైచేయి సాధిస్తున్నప్పుడు అసందర్భ వ్యాఖ్యలు (స్లెడ్జింగ్) చేస్తూ.. ఏకాగ్రతను చెదరగొట్టడంలో ఆస్ట్రేలియా ఆటగాళ్ల తర్వాతే ఎవరైనా అని చెప్పుకోవాలి. గత కొన్నేళ్లుగా ఈ పంథానే ఆసీస్ అవలంబిస్తూ వస్తోంది. ఫిబ్రవరి 23 నుంచి భారత్‌తో జరగనున్న నాలుగు టెస్టుల సిరీస్‌లోనూ స్లెడ్జింగ్ చేసేందుకు వెనకాడబోమని ఏకంగా ఆసీస్ కెప్టెన్ స్టీవ్ స్మిత్ చెప్పడంతో వేడి రాజుకుంటోంది.

ఈ వ్యాఖ్యలపై భారత ఆఫ్ స్పిన్నర్ హర్భజన్ సింగ్ తాజాగా స్పందించాడు. గతంలో భారత్ జట్టు తీరు వేరు.. ఇప్పుడు పూర్తిగా మారిపోయింది కాబట్టి జాగ్రత్తగా ఉండాలంటూ కంగారూలను హెచ్చరిస్తున్నాడు. ‘ స్లెడ్జింగ్ చేస్తుంటే.. ఆ మాటలు విని ఔటై మౌనంగా వెనక్కి వెళ్లి కూర్చునే టీమిండియా కాదు ఇప్పుడు ఉండేది. మీ కవ్వింపులకు మాటలతోనే కాదు ఆటతో కూడా సమాధానమిస్తుంది. ఆ దూకుడును కాచుకునే దమ్ముంటేనే స్లెడ్జింగ్‌కు దిగండి’ అని సూచించాడు. ఇంత చెప్పినా.. మీరు మీ పాతబాటలోనే వెళ్తామంటే ఆస్ట్రేలియా టీమ్‌కి ఆల్ ద బెస్ట్ అని చమత్కరించాడు.

పదేళ్ల క్రితం ఆస్ట్రేలియా పర్యటనలో హర్భజన్ సింగ్, ఆండ్రూ సైమండ్స్ మధ్య చెలరేగిన మంకీ గేట్ వివాదాన్ని గుర్తు చేసుకుని భజ్జీ ఈ మాటలన్నట్లు తెలుస్తోంది. అప్పట్లో తీవ్ర సంచలనం రేపిన ఈ వివాదాన్ని భారత్ అత్యంత చాకచక్యంగా పరిష్కరించుకోగలిగింది. భారత టెస్టు కెప్టెన్‌గా విరాట్ కోహ్లి బాధ్యతలు తీసుకున్న తర్వాత అతనితో పాటు ఆటగాళ్లందరూ దూకుడు మంత్రాన్ని జపిస్తున్న విషయం తెలిసిందే.