బీసీసీఐ అధ్యక్షుడిగా గంగూలీ పదవీకాలం పూర్తి.. రాజీనామా చేస్తాడా..?

భారత క్రికెట్ నియంత్రణ మండలి (బీసీసీఐ) అధ్యక్షుడిగా సౌరవ్ గంగూలీ పదవీకాలం 9 నెలల్లోనే ముగిసింది. బీసీసీఐ కొత్త రాజ్యాంగం ప్రకారం బోర్డు లేదా రాష్ట్ర క్రికెట్ సంఘాల్లో ఆరేళ్లు పదవిలో ఉన్న తర్వాత సదరు వ్యక్తి కనీసం మూడేళ్లు విరామం తీసుకోవాలి. ఈ లెక్కన బెంగాల్ క్రికెట్ అసోషియేషన్ (క్యాబ్) ప్రెసిడెంట్‌గా ఐదేళ్లకిపైగా ఉన్న గంగూలీ.. ఆ వెంటనే గత ఏడాది బీసీసీఐ అధ్యక్షుడిగా ఎన్నికయ్యాడు. మొత్తంగా.. సోమవారంతో అతను వరుసగా బోర్డు లేదా అనుబంధ రాష్ట్ర క్రికెట్ అసోషియేషన్‌‌లో వరుసగా ఆరేళ్లు పదవి అనుభవించాడు. దాంతో.. కొత్త రాజ్యాంగం ప్రకారం.. మూడేళ్లు కూలింగ్ పిరియడ్ తప్పనిసరి.

వాస్తవానికి బీసీసీఐ అధ్యక్షుడిగా తొమ్మిది నెలల్లోనే తాను దిగిపోవాల్సి ఉంటుందని సౌరవ్ గంగూలీకి కూడా తెలుసు. కానీ.. బోర్డు రాజ్యాంగ సవరణతో ఆ కూలింగ్ పీరియడ్‌ రూల్‌ని ఇటీవల మార్చిన బీసీసీఐ కార్యవర్గం.. సుప్రీంకోర్టు అనుమతి కోరింది. కానీ.. సుప్రీంకోర్టు అనూహ్యంగా విచారణని ఆగస్టు రెండో వారానికి వాయిదా వేయడంతో ఇప్పుడు గంగూలీ ఎటూ తేల్చుకోలేకపోతున్నాడు. నిబంధనల ప్రకారం సోమవారం తన పదవీకాలం ముగియడంతో అతను అధ్యక్ష పదవికి రాజీనామా చేయాలి. అయితే.. సుప్రీంకోర్టు తీర్పు తర్వాతే తాను తుది నిర్ణయం తీసుకోనున్నాడని సమాచారం.

బీసీసీఐ అధ్యక్షుడు సౌరవ్ గంగూలీతో పాటు బోర్డు సెక్రటరీ జై షా పరిస్థితి కూడా అగమ్యగోచరంగా మారింది. ఇంకా ఆసక్తికరమైన విషయం ఏంటంటే..? గంగూలీ పదవీకాలం సోమవారంతో ముగియగా.. జై షా పదవీకాలం గత మే నెలలోనే ముగియడం గమనార్హం. ఒకవేళ కూలింగ్ పీరియడ్ మార్పునకి సుప్రీంకోర్టు అనుమతిస్తే గంగూలీతో పాటు జై షా పదవిలో కొనసాగనున్నాడు. లేకపోతే.. ఇద్దరూ రాజీనామా చేయాల్సిందే.