భారత్‌ని దెబ్బకొట్టే వ్యూహం అదే..!

భారత్‌ని వన్డే సిరీస్‌లో దెబ్బతీయాలంటే స్పిన్నర్లని న్యూజిలాండ్ బ్యాట్స్‌మెన్ సమర్థంగా ఎదుర్కోవాలని ఆ జట్టు మిడిలార్డర్ బ్యాట్స్‌మెన్ టామ్ లాథమ్ సూచించాడు. ముంబయి వేదికగా భారత్ ప్రెసిడెంట్స్ ఎలెవన్ జట్టుతో గురువారం జరిగిన రెండో ప్రాక్టీస్ వన్డేలో టామ్ లాథమ్ (108: 97 బంతుల్లో 7x4, 2x6) శతకం బాది కివీస్ విజయంలో కీలకపాత్ర పోషించాడు. వాంఖడే వేదికగా భారత్‌తో ఆదివారం తొలి వన్డేలో న్యూజిలాండ్ ఢీకొంటున్న నేపథ్యంలో జట్టు సన్నద్ధతపై లాథమ్ మాట్లాడాడు.

‘భారత్‌లో మా దృష్టి అంతా స్పిన్‌ని ఎదుర్కోవడంపైనే ఉంది. పేస్ బౌలర్లతో పోలిస్తే.. స్పిన్నర్ల బౌలింగ్‌లోనే బంతి‌ని ఫీల్డర్ల మధ్యలోంచి నెట్టి బౌండరీ సాధించడం కష్టం. ఇప్పటికే ముగిసిన రెండు ప్రాక్టీస్ వన్డేల్లోనూ ఎడమ చేతి వాటం స్పిన్నర్లతో పాటు.. లెగ్ స్పిన్నర్ కర్ణ్‌శర్మ బౌలింగ్ ఆడిన అనుభవం మా జట్టు బ్యాట్స్‌మెన్‌కి కలిసొస్తుంది. ప్రస్తుతం టీమిండియాలో ఉన్న మణికట్టు స్పిన్నర్లు కుల్దీప్ యాదవ్, చాహల్ చాలా నైపుణ్యమున్న బౌలర్లు. శ్రీలంక, ఆస్ట్రేలియాతో సిరీస్‌లో మెరుగ్గా రాణించి వారు పూర్తి ఆత్మవిశ్వాసంతో ఉన్నారు. అందుకే.. వారి బౌలింగ్‌ శైలికి సంబంధించిన వీడియో ఫుటేజీలను పరిశీలించి మరీ ప్రాక్టీస్ చేస్తున్నాం’ అని టామ్ లాథమ్ వెల్లడించాడు.