టీమిండియాలో నయా ఆల్‌రౌండర్.. హార్దిక్ పాండ్యా జాగ్రత్త

భారత్ జట్టులో కొత్త ఆల్‌రౌండర్ వెలుగులోకి వచ్చాడు. ఆస్ట్రేలియా-ఎ జట్టుతో శుక్రవారం మొదలైన ప్రాక్టీస్ మ్యాచ్‌లో హాఫ్ సెంచరీ బాదిన జస్‌ప్రీత్ బుమ్రా (55 నాటౌట్: 57 బంతుల్లో 6x4, 2x6) టీమిండియా టాప్ స్కోరర్‌గా నిలిచాడు. టాప్ ఆర్డర్ బ్యాట్స్‌మెన్‌లు విఫలమైన వేళ.. బుమ్రా ఆడిన తీరుకి ఫిదా అయిన భారత క్రికెటర్లు.. ఇన్నింగ్స్ ముగిసిన తర్వాత గార్డ్ హాఫ్ హానర్‌తో అతనికి డ్రెస్సింగ్ రూములోకి స్వాగతం పలికారు.


భారత క్రికెటర్లే కాదు.. అభిమానులు కూడా బుమ్రా ఆటతీరుపై ట్విట్టర్‌లో ప్రశంసల వర్షం కురిపిస్తున్నారు. ఆల్‌రౌండర్ హార్దిక్ పాండ్యాతో పోలికలు తెస్తూ.. నీకంటే బెటర్ ఆల్‌రౌండర్‌గా బుమ్రా కనిపిస్తున్నాడంటూ సెటైర్లు పేలుస్తున్నారు. మరికొందరు నెం.4లో బ్యాటింగ్ చేయాల్సిందిగా జస్‌ప్రీత్ బుమ్రాని కోరుతుండటం గమనార్హం.


బుమ్రా హాఫ్ సెంచరీ బాదడంతో టాస్ గెలిచి మొదట బ్యాటింగ్ చేసిన భారత్ జట్టు 194 పరుగులకి ఆలౌటవగా.. అనంతరం తొలి ఇన్నింగ్స్‌లో ఆస్ట్రేలియా-ఎ టీమ్‌ 108 పరుగులకే కుప్పకూలిపోయింది. దాంతో.. ఇప్పటికే 86 పరుగుల ఆధిక్యాన్నిఅందుకున్న భారత్ జట్టు ఈరోజు రెండో ఇన్నింగ్స్‌ ఆడనుంది. బౌలింగ్‌లోనూ 9 ఓవర్లు వేసిన బుమ్రా 33 పరుగులిచ్చి రెండు వికెట్లు పడగొట్టాడు.