బంగ్లాదేశ్ ‘అతి’ సంబరాలపై ఐసీసీ సీరియస్..?

దక్షిణాఫ్రికా గడ్డపై అండర్-19 ప్రపంచకప్‌లో గెలిచిన బంగ్లాదేశ్ జట్టు.. మైదానంలో ఉన్న భారత క్రికెటర్లని కవ్విస్తూ చేసుకున్న అతి సంబరాలపై అంతర్జాతీయ క్రికెట్ కౌన్సిల్ (ఐసీసీ) సీరియస్‌ యాక్షన్ తీసుకోబోతోంది. ఆదివారం జరిగిన ఫైనల్ మ్యాచ్‌లో తొలుత బ్యాటింగ్ చేసిన భారత యువ జట్టు 47.2 ఓవర్లలో 177 పరుగులకి ఆలౌటవగా.. వర్షం కారణంగా కుదించిన 170 పరుగుల లక్ష్యాన్ని 42.1 ఓవర్లలో బంగ్లాదేశ్ ఛేదించింది. దీంతో.. తొలిసారి అండర్-19 వరల్డ్‌కప్‌లో విజేతగా నిలిచిన బంగ్లాదేశ్ శ్రుతిమించి సంబరాలు చేసుకుంది.

IND vs BAN Trolls: పాక్ నుంచి తికమక నేర్చుకున్నారా.. ?


మ్యాచ్‌ గెలవగానే మైదానంలోకి దూసుకొచ్చిన ఆ జట్టు ఆటగాళ్లు.. నిరాశలో ఉన్న భారత క్రికెటర్లని కవ్విస్తూ సంబరాలు చేసుకున్నారు. ముఖ్యంగా.. ఆ జట్టు ఫాస్ట్ బౌలర్ షొరిఫుల్ ఇస్లామ్ హద్దు దాటి వెకిలి చేష్టలతో రెచ్చిపోయాడు. దీంతో.. భారత ఆటగాళ్లు కూడా ధీటుగా బదులిచ్చేందుకు ప్రయత్నించడంలో ఫీల్డ్ అంపైర్లు కలగజేసుకుని సర్దిచెప్పారు. అయినప్పటికీ.. బంగ్లాదేశ్ ఆటగాళ్లు వెనక్కి తగ్గకుండా అలానే కవ్వింపులని కొనసాగించారు.

Read Also: శెభాష్.. నసీమ్ షా.. 17 ఏళ్లకే ప్రపంచ రికార్డు

మైదానంలో క్రమశిక్షణ తప్పిన బంగ్లాదేశ్ ఆటగాళ్లపై ఐసీసీ కఠిన చర్యలు తీసుకునే అవకాశం ఉంది. ఈ మేరకు మ్యాచ్ రిఫరీ కూడా స్పష్టమైన సంకేతాలిచ్చినట్లు భారత అండర్-19 జట్టు టీమ్ మేనేజర్ అనిల్ పటేల్ వెల్లడించారు. ‘అక్కడ ఏం జరిగిందో..? మాకు తెలియదు. కానీ.. మైదానంలో బంగ్లాదేశ్ ఆటగాళ్ల తీరుతో షాక్‌కి గురయ్యాం. ఐసీసీ ఈ గొడవ వీడియోలని పరిశీలించిన తర్వాత నిర్ణయం తీసుకోబోతున్నట్లు మ్యాచ్ రిఫరీ నాకు చెప్పారు’ అని మేనేజర్ స్పష్టం చేశారు.