ఐపీఎల్ 2020 తర్వాత హర్భజన్ రిటైర్మెంట్..? స్పిన్నర్ క్లారిటీ

భారత వెటరన్ ఆఫ్ స్పిన్నర్ హర్భజన్ సింగ్ గత నాలుగేళ్ల నుంచి టీమిండియాకి దూరంగా ఉంటున్నా.. ఐపీఎల్‌లో మాత్రం రెగ్యులర్‌ ఆటగాడిగా కొనసాగుతున్నాడు. రెండేళ్ల క్రితం ముంబయి ఇండియన్స్ ఫ్రాంఛైజీ అతడ్ని వదులుకున్నా.. చెన్నై సూపర్ కింగ్స్ అక్కున చేర్చుకుంది. 2019 ఐపీఎల్ సీజన్‌లో 11 మ్యాచ్‌లాడిన భజ్జీ 16 వికెట్లు పడగొట్టాడు. అయితే.. ఇటీవల 40వ పడిలోకి అడుగుపెట్టిన హర్భజన్ సింగ్.. ఐపీఎల్ 2020 సీజన్ తర్వాత క్రికెట్‌కి రిటైర్మెంట్ ప్రకటించబోతున్నట్లు వార్తలు వచ్చాయి. ఇదే విషయాన్ని తాజాగా ఓ ఇంటర్వ్యూలో భజ్జీని ప్రశ్నించగా అతను సమాధానమిచ్చాడు.

‘‘నా బౌలింగ్ సామర్థ్యాన్ని ఇప్పటికీ పరీక్షించాలనుకుంటున్నారా..? నేను రెడీ. ఇటీవలకాలంలో అత్యుత్తమంగా రాణిస్తున్న యువ స్పిన్నర్‌తో పోటీపడేందుకు నేను సిద్ధమే. చాలా రోజుల నుంచి టీమిండియాకి నేను దూరంగా ఉంటున్న మాట నిజమే. కానీ.. నాకు ఎవరి జాలి అవసరం లేదు. ఇప్పటికీ నేను భారత్ తరఫున అత్యుత్తమ ప్రదర్శన కనబర్చగలను. ఇక ఐపీఎల్ 2020 నేను ఆడే ఆఖరి టోర్నీ అని చెప్పలేను. అది నా శరీరం సహకరించే తీరుపై ఆధారపడి ఉంటుంది. గత నాలుగు నెలలుగా నా బాడీకి పూర్తిగా విశ్రాంతి దొరికింది. అలానే రెగ్యులర్‌గా యోగా చేశాను. దాంతో.. 2013 నాటి ఉత్సాహం ఇప్పుడు నాలో కనిపిస్తోంది. ఆ ఐపీఎల్ సీజన్‌లో నేను 24 వికెట్లు పడగొట్టాను’’ అని హర్భజన్ సింగ్ గుర్తు చేసుకున్నాడు.

భారత్‌ తరఫున 103 టెస్టులు, 236 వన్డేలు, 28 టీ20 మ్యాచ్‌లాడిన హర్భజన్ సింగ్.. మొత్తం 711 వికెట్లు పడగొట్టాడు. ఇక ఐపీఎల్‌లో 160 మ్యాచ్‌లాడి.. 150 వికెట్లు పడగొట్టిన భజ్జీ.. టోర్నీలో అత్యుత్తమ ప్రదర్శన 5/18గా ఉండటం గమనార్హం.