అపూర్వ స్నేహితుడితో సచిన్

పాఠశాల వయసులోనే ప్రపంచ రికార్డులు బద్ధలు కొట్టేసి వెలుగులోకి వచ్చారు భారత మాజీ క్రికెటర్లు సచిన్ తెందుల్కర్- వినోద్ కాంబ్లే. స్కూల్ టోర్నమెంట్‌లో భాగంగా జరిగిన ఓ మ్యాచ్‌లో ఈ జోడి ఏకంగా 664 పరుగుల అజేయ భాగస్వామ్యం నెలకొల్పి అప్పటి క్రికెట్ ప్రపంచాన్ని నివ్వెరపరిచింది. ఆ మ్యాచ్‌లో వినోద్ కాంబ్లే 349 పరుగులు చేయగా.. సచిన్ తెందుల్కర్ 326 పరుగులతో నాటౌట్‌గా నిలిచాడు. స్కూల్ క్రికెట్ నుంచి వీరి స్నేహం క్రమంగా భారత్ జట్టుకి ఆడే వరకూ సాఫీగానే కొనసాగింది. కానీ.. మధ్యలో ఏవో చిన్న చిన్న మనస్పర్థలు వచ్చిన్నట్లు వార్తలు వచ్చాయి. అయితే వాటిపై ఇద్దరూ సీరియస్‌గా స్పందించలేదు.

తాజాగా సచిన్ తెందుల్కర్ జీవితం ఆధారంగా తెరకెక్కిన ‘సచిన్: ఎ బిలియన్ డ్రీమ్స్’ చిత్రం విడుదల కావడంతో వినోద్ కాంబ్లే తమ స్నేహాన్ని గుర్తు చేసుకుంటూ సోషల్ మీడియాలో ఒక ఫొటోను అభిమానులతో పంచుకున్నాడు. ‘డియర్ మాస్టర్ బ్లాస్టర్.. ఐ లవ్ యూ’ అంటూ అందులో రాసుకొచ్చి స్నేహితుడిపై ప్రేమను కురిపించాడు. ఇద్దరూ కొంతకాలం భారత్ జట్టుకి ఆడినా.. వ్యక్తిగత కారణాలతో వినోద్ కాంబ్లే మధ్యలోనే కెరీర్‌కి స్వస్తి చెప్పేశాడు.