విరాట్ కోహ్లి@200.. రికార్డులకి మోక్షం

భారత్ కెప్టెన్ విరాట్ కోహ్లి కెరీర్‌లో అరుదైన మైలురాయిని ఆదివారం చేరుకోనున్నాడు. వాంఖడే వేదికగా న్యూజిలాండ్‌తో జరగనున్న తొలి వన్డేతో విరాట్ కోహ్లి 200వ వన్డే ఆడిన 14వ భారత క్రికెటర్‌గా రికార్డుల్లో నిలవనున్నాడు. క్రికెట్ చరిత్రలో 72వ క్రికెటర్‌గా ఈ ఘనత అందుకోనున్నాడు. ఈ జాబితాలో సచిన్ తెందుల్కర్ 463 వన్డేలతో అగ్రస్థానంలో ఉండగా.. రాహుల్ ద్రవిడ్ (344), అజహరుద్దీన్ (334), సౌరవ్ గంగూలీ (311), ధోనీ (306) భారత్ తరఫున టాప్-5లో ఉన్నారు.

కెరీర్‌లో 200వ వన్డేలాడే సమయానికి ఎక్కువ పరుగులు చేసిన క్రికెటర్ల జాబితాలో మాత్రం విరాట్ కోహ్లి ఇప్పటికే అగ్రస్థానంలో నిలిచాడు. 199 వన్డేల్లో కోహ్లి 8,767 పరుగులు చేయగా.. తర్వాత దక్షిణాఫ్రికా హిట్టర్ ఏబీ డివిలియర్స్ (8,621), సౌరవ్ గంగూలీ (7,747), సచిన్ తెందుల్కర్ (7,305), రికీ పాంటింగ్ (7,255) టాప్-5లో ఉన్నారు. 30 వన్డే శతకాలతో ఇప్పటికే అందరినీ దాటుకుని సచిన్ తెందుల్కర్ (49 శతకాలు) తర్వాత స్థానంలో నిలిచిన కోహ్లి.. 200వ వన్డేలో శతకం సాధించి చిరస్మరణీయం చేసుకోవాలని ఉవ్విళ్లూరుతున్నాడు.