విరాట్ కోహ్లి-అనుష్క పెళ్లి వచ్చే వారమేనా?

టీమిండియా కెప్టెన్ విరాట్ కోహ్లి తన ప్రియురాలు అనుష్క శర్మను ఈ నెలలోనే పెళ్లాడబోతున్నాడని సమాచారం. డిసెంబర్ రెండో వారంలో వీరిద్దరూ ఇటలీలో పెళ్లి చేసుకోనున్నట్లు తెలుస్తోంది. ఈ నెల 12న వీరి పెళ్లి జరగనుండగా.. 9వ తేదీ నుంచే పెళ్లి వేడుకలు జరగనున్నట్లు సమాచారం. వివాహం చేసుకోవడానికి వీరిద్దరూ గురువారం ఇటలీ వెళ్లనున్నట్లు సమాచారం. పెళ్లి కూతురుగా అనుష్క ధరించే వస్త్రాలను ఫ్యాషన్ డిజైనర్ సబ్యసాచి ముఖర్జీ డిజైన్ చేసినట్లు సమాచారం. గతవారం ఆయన బాలీవుడ్ హీరోయిన్ ఇంట్లో కనిపించడం ఈ వార్తలకు బలం చేకూరుస్తోంది.

విరూష్క పెళ్లి వేడుకను తిలకించడానికి కుటుంబ సభ్యులు, స్నేహితులు ఇటలీ వెళ్లేందుకు ఇప్పటికే టికెట్లు కూడా బుక్ చేసుకున్నారట. ఫ్యాషన్ రాజధానిగా విలసిల్లుతోన్న మిలాన్‌లో వీరిద్దరూ వివాహం చేసుకోనున్నారని, పెళ్లికి క్రికెటర్లు ఎవరూ హాజరు కావడం లేదని సమాచారం.

డిసెంబర్ 21న కొత్త జంట ముంబైలో రిసెప్షన్ పార్టీ ఏర్పాటు చేయనుందట. అనుష్క పబ్లిసిటీ వ్యవహారాలను చూసే బృందం ఈ విషయాలను గోప్యంగా ఉంచుతున్నట్లు సమాచారం. గత ఏడాది డిసెంబర్లోనే తొలిసారిగా వీరి పెళ్లి వార్తలు బయటకు వచ్చాయి.

డిసెంబర్ 7న జరగనున్న మ్యాచ్‌కు విరాట్ కోహ్లి చిన్ననాటి కోచ్, ఢిల్లీ అండర్-23 కోచ్ రాజ్‌కుమార్ శర్మ హాజరు కావడం లేదు. కారణం అడగ్గా తన మేనల్లుడి పెళ్లి ఉందని ఆయన చెప్పారు. తనకు విశ్రాంతి కావాలని చెప్పిన కోహ్లి.. శ్రీలంకతో జరగనున్న వన్డే, టీ20 సిరీస్‌లకు దూరమైన సంగతి తెలిసిందే.