Ind vs Aus: భారత్ కెప్టెన్‌గా విరాట్ కోహ్లి నెం.1 రికార్డ్..!

ఆస్ట్రేలియాతో ఈరోజు ముగిసిన తొలి టెస్టు మ్యాచ్‌లో భారత్ జట్టు‌ని విజయపథంలో నడిపిన కెప్టెన్ విరాట్ కోహ్లి అరుదైన రికార్డ్‌ నెలకొల్పాడు. అడిలైడ్‌ వేదికగా జరిగిన ఈ టెస్టు మ్యాచ్‌లో సత్తాచాటిన టీమిండియా 31 పరుగుల తేడాతో ఘన విజయం సాధించి.. నాలుగు టెస్టుల సిరీస్‌‌లో 1-0తో ఆధిక్యాన్ని అందుకుంది. తాజా గెలుపుతో దక్షిణాఫ్రికా, ఇంగ్లాండ్, ఆస్ట్రేలియా గడ్డపై కనీసం ఒక టెస్టు మ్యాచ్ గెలిచిన తొలి ఆసియా కెప్టెన్‌గా విరాట్ కోహ్లి సరికొత్త రికార్డు సృష్టించాడు.

ఈ ఏడాది ఆరంభంలో దక్షిణాఫ్రికా పర్యటనకి వెళ్లిన భారత్ జట్టు తొలి రెండు టెస్టుల్లో ఓడినప్పటికీ.. ఆఖరి టెస్టులో గెలుపొంది మూడు టెస్టుల సిరీస్‌‌ని 1-2తో ముగించింది. ఆ గడ్డపై మూడు టెస్టుల్లో (ఆరు ఇన్నింగ్స్‌) కలిపి విరాట్ కోహ్లి 47.67 సగటుతో 286 పరుగులు చేశాడు. ఆ పర్యటన తర్వాత జూలైలో ఇంగ్లాండ్‌ గడ్డపైకి వెళ్లిన భారత్ జట్టు ఐదు టెస్టుల సిరీస్‌లో నిరాశపరిచింది. విరాట్ కోహ్లి 10 ఇన్నింగ్స్‌ల్లో 59.30 సగటుతో 593 పరుగులు చేసినా.. భారత్ జట్టు మాత్రం సిరీస్‌ని 1-4తో చేజార్చుకుంది.

ఆస్ట్రేలియాతో తాజాగా అడిలైడ్‌ టెస్టులో విరాట్ కోహ్లి 37 (3, 34) పరుగులతో నిరుత్సాహపరిచినా.. చతేశ్వర్ పుజారా 194 రన్స్‌తో (123, 71) టాప్ స్కోరర్‌గా నిలిచి భారత్‌ విజయంలో క్రియశీలక పాత్ర పోషించాడు.