వన్డేలో రెండు బంతులు బౌలర్లకి శాపం..!

వన్డే‌లో రెండు బంతుల వినియోగంపై భారత కెప్టెన్ విరాట్ కోహ్లి పెదవి విరిచాడు. ఐర్లాండ్‌‌తో రెండు టీ20ల సిరీస్ ఆడేందుకు శనివారం అక్కడికి భారత జట్టు బయల్దేరనున్న నేపథ్యంలో శుక్రవారం మీడియాతో కోహ్లి మాట్లాడాడు. వన్డేలో రెండు బంతుల నిబంధన బౌలర్లపై క్రూరమైన చర్యగా అభివర్ణించిన కోహ్లి.. గతంతో పోలిస్తే ఇప్పుడు బ్యాటింగ్ అంత ఛాలెంజింగ్‌గా లేదని వెల్లడించాడు.

ఐసీసీ 2011లో సవరించిన నిబంధనల ప్రకారం ఒక వన్డే మ్యాచ్‌లో రెండు బంతుల్ని వినియోగిస్తున్నారు. దీని ప్రకారం మైదానంలో ఉండే ఇద్దరు ఫీల్డ్ అంపైర్ల వద్ద చెరొక బంతి ఉంటుంది. ఎవరైతే నాన్‌స్ట్రైక్ ఎండ్‌లో అంపైరింగ్‌ వస్తారో..? అప్పుడు వారు తమ వద్ద ఉన్న బంతిని బౌలర్‌కి ఇస్తారు. అంటే 50 ఓవర్ల ఆటలో ఒక బంతిని 25 ఓవర్ల చొప్పున వాడతారన్నమాట. ఇదే బౌలర్లకి శాపంగా మారింది. బంతి పాతబడకపోవడంతో రివర్స్‌స్వింగ్‌ని బౌలర్ల రాబట్టలేకపోతున్నారు. దీంతో.. స్వేచ్ఛగా బ్యాట్‌ ఝళిపిస్తున్న బ్యాట్స్‌మెన్ భారీ స్కోర్లు బాదేస్తున్నారు. ఇటీవల ఆస్ట్రేలియాతో ముగిసిన వన్డే మ్యాచ్‌లో ఇంగ్లాండ్‌ జట్టు 481 పరుగులు చేయడమే దీనికి ఉదాహరణ.

‘వన్డేలో రెండు బంతుల వినియోగంపై చాలా చదివాను. ఇది బౌలర్ల పాలిట క్రూరమైన చర్య. బౌలర్లు అటాక్ చేసేందుకు ఉన్న అవకాశాన్ని ఈ నిబంధన ద్వారా దూరం చేశారు. నేను వన్డేలు ఆడిన మొదట్లో.. కేవలం ఒక బంతితో మాత్రమే ఆడించేవారు. దీనివల్ల బౌలర్లు క్రమంగా రివర్స్ స్వింగ్ రాబట్టేవారు. సగం ఇన్నింగ్స్ ముగిశాక.. బ్యాటింగ్ చేయడం ఓ సవాల్‌గా మారేది. కానీ.. ఇప్పుడు బౌలర్లకి ఆ అవకాశమే లేకుండా పోయింది. జట్టులో మణికట్టు స్పిన్నర్లు ఉంటే.. మిడిల్ ఓవర్లలో ఆ జట్టు కాస్త పరుగుల్ని కట్టడి చేయగలదు’ అని కోహ్లి వెల్లడించాడు.

కోహ్లి కంటే ముందు వన్డేలో రెండు బంతుల వినియోగంపై సచిన్ టెండూల్కర్ కూడా ఘాటుగా స్పందించాడు. ‘వన్డే మ్యాచ్‌లో రెండు కొత్త బంతులు వాడటం అనేది వినాశనానికి అత్యుత్తమ విధానం. రివర్స్ స్వింగ్‌కు అనుకూలించేలా బంతి పాతబడటానికి సమయం ఉండదు. కాబట్టి.. డెత్ ఓవర్లో కొంత కాలంగా రివర్స్ స్వింగ్ చూడటం లేదు’అని సచిన్ ట్వీట్ చేశాడు.