పాక్ బౌలర్‌కి కోహ్లి భయపడుతున్నాడా..?

ఫార్మాట్ ఏదైనా.. భారత్ కెప్టెన్ విరాట్ కోహ్లి ప్రత్యర్థి బౌలర్లపై పూర్తి స్థాయిలో ఆధిపత్యం చెలాయిస్తుంటాడు. ఇప్పటికే ప్రపంచ అగ్రశ్రేణి బౌలర్లకి సైతం పీడకలల్ని మిగిల్చిన కోహ్లి.. పాకిస్థాన్ బౌలర్ మహ్మద్ అమీర్ బౌలింగ్‌లో మాత్రం రాణించలేకపోతున్నాడట. ఈ విషయాన్ని కోహ్లినే స్వయంగా వెల్లడించాడు. న్యూజిలాండ్‌తో వన్డే సిరీస్‌ కోసం ప్రస్తుతం విరాట్ కోహ్లి సిద్ధమవుతున్నాడు. ఆదివారం వాంఖడే వేదికగా తొలి వన్డే జరగనుంది. కెరీర్‌లో ఎదుర్కొన్న అత్యంత కఠినమైన బౌలర్‌ ఎవరని అడిగితే.. కోహ్లి సమాధానమిచ్చాడు.

‘ఇటీవల కాలంలో పాకిస్థాన్ ఫాస్ట్ బౌలర్ మహ్మద్ అమీర్ నిలకడగా రాణిస్తున్నాడు. ప్రపంచంలోని టాప్-3 బౌలర్లలో ప్రస్తుతం అతను కచ్చితంగా ఉంటాడు. నా కెరీర్‌లో నేను ఎదుర్కొన్న కఠినమైన బౌలర్లలో అమీర్ ఒకడు. అతని బౌలింగ్‌లో ఆడేటప్పుడు అత్యుత్తమ ఆటని వెలికితీయాల్సిందే. అతని బౌలింగ్ వేగం, పదును అమోఘం. చాలా నైపుణ్యమున్న బౌలర్’ అని కోహ్లి వివరించాడు. 2016 ఆసియా కప్‌ నుంచి అమీర్ బౌలింగ్‌ని ఎదుర్కొంటున్న కోహ్లి.. ఆశించిన మేర పరుగులు రాబట్టలేకపోతున్నాడు. ముఖ్యంగా ఈ ఏడాది జూన్‌లో ముగిసిన ఛాంపియన్స్ ట్రోఫీలో అమీర్ బౌలింగ్‌లోనే కోహ్లి వరుసగా రెండుసార్లు బంతిని గాల్లోకి లేపేశాడు. తొలిసారి.. అజహర్ అలీ స్లిప్‌లో బంతిని నేలపాలు చేసినా.. తర్వాత.. బంతికే షదాబ్ ఖాన్ చక్కగా క్యాచ్ అందుకున్నాడు. కోహ్లి‌తో పాటు రోహిత్ శర్మ కూడా అమీర్ బౌలింగ్‌లోనే ఎక్కువ ఇబ్బందిపడుతున్నాడు.