విరాట్ కోహ్లీ మనిషి కాదు..: హర్భజన్

అతడు క్రీజులో దిగితే రికార్డులు బద్దలవుతాయని టీమిండియా క్రికెటర్ హర్భజన్ సింగ్ అంటున్నాడు. ఆ క్రికెటర్ నిబద్ధత, కఠోర శ్రమ గురించి ఎంత చెప్పినా తక్కువేనట. ఆ ఆటగాడు మరెవరో కాదు టీమిండియా కెప్టెన్ విరాట్ కోహ్లీనే. అత్యంత వేగవంతంగా వన్డేల్లో 10 వేల పరుగుల మైలురాయిని అందుకున్న కోహ్లీకి హ్యాట్సాఫ్ అంటున్నాడు భజ్జీ. భారత కెప్టెన్ మనిషి కాదని, అతడు నిజంగానే పరుగుల యంత్రమేనని పేర్కొంటూ తన అభిమానాన్ని చాటుకున్నాడు.

మరో ఆటగాడికి కోహ్లీ రికార్డులు, ఫీట్లు అసాధ్యమని అభిప్రాయపడ్డాడు. కోహ్లీ అంకితభావానికి, ఆటతీరుకు ఎవరైనా వందనం చేయాల్సిందేనని తాజాగా మీడియాతో మాట్లాడుతూ చప్పాడు. ఈ మధ్య కాలంలో తాను చూసి అత్యుత్తమ క్రికెటర్ కోహ్లీ అని కితాబిచ్చాడు. మైదానంలో దిగిన ప్రతిసారి అతడు తన పనిని నిర్వర్తిస్తాడు. అంచనాలను అందుకుని రాణించే అరుదైన ఆటగాళ్లలో కోహ్లీ ఒకడు. విరాట్ కోహ్లీలా ఆటడం మరో ఆటగాడికి సాధ్యం కాదన్నాడు. జట్టు భారాన్ని తన భుజాలపై మోస్తున్నాడు.

చాలా మంది దిగ్గజాలతో క్రికెట్ ఆడాననీ, ప్రస్తుత తరంలో మాత్రం కోహ్లీనే నెంబర్ వన్ అని హర్భజన్ ప్రశంసల వర్షం కురిపించాడు. పుణేలోని మహారాష్ట్ర క్రికెట్ అసోసియేషన్ స్టేడియంలో శుక్రవారం మూడో వన్డేలో భాగంగా వెస్టిండీస్, భారత్ జట్లు తలపడనున్నాయి. తొలి వన్డేలో కోహ్లీసేన నెగ్గగా, చివరివరకూ ఉత్కంఠగా సాగిన రెండో వన్డే టైగా ముగిసింది.