దేవుడా.. నా బౌలింగ్‌లో కోహ్లి సిక్స్ వద్దు

పదునైన ఫాస్ట్ బౌలింగ్‌తో దశాబ్దంపాటు క్రికెట్ చరిత్రలో చెరగని ముద్రవేశాడు ఆస్ట్రేలియా మాజీ పేస్ బౌలర్ బ్రెట్‌లీ. సహచరుడు మె‌క్‌గ్రాత్‌తో కలిసి ఆసీస్ జట్టుకి ప్రపంచకప్‌లో బ్రెట్‌లీ అందించిన విజయాలు ఎప్పటికీ చిరస్మరణీయమే. తాజాగా తమిళనాడు ప్రీమియర్‌ లీగ్‌‌ కోసం చెన్నై వచ్చిన బ్రెట్‌లీ కెరీర్‌కి సంబంధించిన ఆసక్తికరమైన విషయాలను మీడియాతో పంచుకున్నాడు. క్రికెట్‌కి వీడ్కోలు పలికిన అనంతరం కుటుంబ సభ్యులకు ఎక్కువ సమయం కేటాయిస్తున్న ఈ ఫాస్ట్ బౌలర్ తన కుమారుడు ప్రెస్టన్ చార్లెస్‌‌ భారత కెప్టెన్ విరాట్ కోహ్లికి వీరాభిమానని వెల్లడించి ఆశ్చర్యపరిచాడు.

‘విరాట్ కోహ్లికి బౌలింగ్ చేసే ముందు.. దయచేసి నా బౌలింగ్‌లో సిక్స్ కొట్టకుండా చూడు అని నేను దేవుడ్ని ప్రార్థించేవాడిని. మైదానం నలువైపులా కోహ్లి బంతిని నేర్పుగా తరలించగలడు. ఇప్పుడు నా పదేళ్ల కొడుకు ప్రెస్టన్ చార్లెస్‌‌ కోహ్లికి వీరాభిమాని. ఇటీవల కోహ్లిని కలిసినప్పుడు ఈ విషయం అతనితో చెప్పాను. వెంటనే తన టెస్టు జెర్సీపై సంతకం చేసి చార్లెస్‌కి బహుమతి ఇవ్వమని అందజేశాడు’ అని బ్రెట్‌లీ వెల్లడించాడు. ఇప్పటికే దక్షిణాఫ్రికా మాజీ క్రికెటర్ జాంటీ రోడ్స్ కూతురు ఇండియా రోడ్స్ కూడా కోహ్లి అభిమానిగా మారిపోయిన విషయం తెలిసిందే.