క్రికెట్ ప్రపంచంలోనే విరాట్ కోహ్లి బెస్ట్..!

క్రికెట్‌లోని మూడు ఫార్మాట్లలో పరుగుల వరద పారిస్తున్న భారత కెప్టెన్ విరాట్ కోహ్లిపై మాజీ కెప్టెన్ సౌరవ్ గంగూలీ ప్రశంసల జల్లు కురిపించాడు. దక్షిణాఫ్రికా గడ్డపై ఇటీవల ముగిసిన సుదీర్ఘ సిరీస్‌లో కోహ్లి మొత్తం నాలుగు శతకాలు సాధించి.. ఓ ద్వైపాక్షిక సిరీస్‌లో సఫారీలపై అత్యధిక పరుగులు చేసిన బ్యాట్స్‌మెన్‌గా నిలిచిన విషయం తెలిసిందే. సుదీర్ఘకాలంగా భారత్ జట్టు ఒక సిరీస్‌ని కూడా సఫారీ గడ్డపై గెలవలేకపోగా.. మూడు టెస్టుల సిరీస్‌ని 1-2తో చేజార్చుకున్నా టీమిండియా.. ఆరు వన్డేల సిరీస్‌ని 5-1తో, మూడు టీ20ల సిరీస్‌ని 2-1తో చేజిక్కించుకుని సగర్వంగా స్వదేశంలో ఇటీవల అడుగుపెట్టింది. తాజాగా ఓ మీడియా సంస్థకిచ్చిన ఇంటర్వ్యూలో గంగూలీ మాట్లాడుతుండగా ‘విరాట్ కోహ్లి, మహేంద్రసింగ్ ధోనీ కెప్టెన్సీలో మీరు గుర్తించిన వ్యత్యాసాలేంటి.?’ అనే ప్రశ్న ఎదురైంది.

‘విరాట్ కోహ్లి, మహేంద్రసింగ్ ధోనీ.. ఇద్దరిదీ భిన్నమైన స్వభావం. మైదానంలో కోహ్లి చాలా దూకుడుగా ఉంటాడు. వాస్తవానికి ఆ దూకుడుతోనే టీమిండియాని ఇప్పుడు మరో మెట్టు ఎక్కించాడు. జట్టు కష్టాల్లో నిలిచిన దశలో అతని నుంచి సాధికారిత ఇన్నింగ్స్‌ వస్తోంది. ఇక మహేంద్రసింగ్ ధోనీది చాలా నెమ్మది స్వభావం. సహచర ఆటగాడి ఒత్తిడిని దూరం చేసేందుకు తానే ముందుకు వచ్చి బాధ్యతలు తీసుకునేందుకు ఏమాత్రం అతను వెనుకంజవేయడు. విరాట్ కోహ్లి కూడా అంతే.. ఇంకా చెప్పాలంటే నేను కూడా ఆ తరహాలోనే వ్యవహరించేవాడ్ని. ఇప్పుడు విరాట్ కోహ్లి అద్భుతమైన ఫామ్‌ని కొనసాగిస్తున్నాడు. ప్రస్తుత క్రికెట్ ప్రపంచంలో అతనే బెస్ట్ ఆటగాడు. కెప్టెన్‌‌గానూ మైదానంలో కోహ్లి చాలా నిజాయతీగా ఉంటాడు. కచ్చితంగా భారత క్రికెట్‌ను అతను మరో స్థాయికి తీసుకెళ్లగలడు’ అని గంగూలీ ధీమా వ్యక్తం చేశాడు.