డీఆర్‌ఎస్‌ సక్సెస్‌.. గంతులేసిన కోహ్లి

భారత్ కెప్టెన్ విరాట్ కోహ్లి మైదానంలో ఎంత ఉత్సాహంగా ఉంటాడో అందరికీ తెలిసిందే. ప్రత్యర్థి వికెట్ పడిన ప్రతిసారీ.. జట్టులోని ఆటగాళ్లందరికంటే తనే ఎక్కువగా సంబరాలు చేసుకుంటూ కనిపిస్తాడు. కెరీర్ ఆరంభం నుంచి కోహ్లీ ఇదే పంథాని కొనసాగిస్తూ వస్తున్నాడు. కెప్టెన్‌గా బాధ్యతలు స్వీకరించిన తర్వాత హుందాగా ప్రవర్తించాలని చాలా మంది మాజీ క్రికెటర్లు చెప్పి చూశారు. కానీ.. కోహ్లీ మాత్రం తన భావోద్వేగాలను అలానే ప్రదర్శిస్తూ వస్తున్నాడు. వాస్తవానికి ఈ దూకుడే కోహ్లీని జట్టులో ప్రత్యేకమైన వ్యక్తిగా నిలబెడుతోంది.

వెస్టిండీస్‌తో హైదరాబాద్‌ వేదికగా శుక్రవారం మొదలైన రెండో టెస్టులోనూ కోహ్లీ ఇలానే సంబరాలు చేసుకుని మరోసారి వార్తల్లో నిలిచాడు. అయితే.. ఈ సారి తాను అడిగిన డీఆర్‌ఎస్ సక్సెక్ కావడంతో.. చిన్నపిల్లల తరహాలో.. మైదానంలో కాసేపు గంతులేశాడు. ఇన్నింగ్స్ 60వ ఓవర్ వేసిన ఉమేశ్ యాదవ్ బౌలింగ్‌లో షేన్ డార్విచ్ (30: 63 బంతుల్లో 4x4, 1x6) బంతిని డిఫెన్స్ చేసేందుకు ప్రయత్నించాడు. కానీ.. బంతి అతని బ్యాట్‌కి అందకుండా నేరుగా వెళ్లి ఫ్యాడ్స్‌ని తాకింది. దీంతో భారత్ ఎల్బీడబ్ల్యూ కోసం అప్పీల్ చేయగా.. బంతి వికెట్లపైకి వెళ్లేలాలేదని భావించిన ఫీల్డ్ అంపైర్ అప్పీల్‌ని తిరస్కరించాడు. అయితే.. బంతి కచ్చితంగా వికెట్లను తాకుతుందని ఊహించిన కోహ్లీ డీఆర్‌ఎస్ అడగ్గా.. రిప్లైలో బంతి స్టంప్స్‌ను తాకేలా కనిపించింది. దీంతో.. ఫీల్డ్ అంపైర్ తన నిర్ణయాన్ని వెనక్కి తీసుకుని.. డార్విచ్‌ ఔటని ప్రకటించాడు. థర్డ్ అంపైర్ రిప్లైని చూస్తూ విశ్లేషిస్తున్న సమయంలోనే.. డార్విచ్ ఔటని తేలిపోవడంతో.. కోహ్లి గాల్లోకి పంచ్‌లు విసురుతూ సంబరాలు చేసుకున్నాడు.