సంగక్కర రికార్డ్ సేఫ్.. తృటిలో చేజార్చుకున్న కోహ్లి!

శ్రీలంకతో టెస్టు సిరీస్‌లో ఓ సెంచరీతోపాటు రెండు డబుల్ సెంచరీలు బాదిన విరాట్ కోహ్లి రికార్డుల మోత మోగించాడు. చివరి టెస్టు రెండో ఇన్నింగ్స్‌లో 50 రన్స్ చేసిన కోహ్లి.. లంకపై మూడు టెస్టుల్లోనే 610 పరుగులు చేశాడు. కోహ్లి గతంలో ఆస్ట్రేలియా, ఇంగ్లాండ్‌ సిరీస్‌ల్లోనూ 600కి పైగా పరుగులు చేశాడు. 2014-15లో ఆసీస్‌పై 692 పరుగులు చేసిన విరాట్.. 2016-17లో ఇంగ్లాండ్‌పై 655 రన్స్ చేశాడు. తద్వారా మూడు సిరీస్‌ల్లో 600కిపైగా పరుగులు చేసిన తొలి భారత క్రికెటర్‌గా రికార్డు నెలకొల్పాడు. గతంలో ద్రవిడ్, గావస్కర్ రెండు సిరీస్‌ల్లో 600+ రన్స్ చేశారు.

విరాట్ కోహ్లి ఈ ఏడాది క్రికెట్లో పరుగుల వరద పారించాడు. మొత్తంగా 46 మ్యాచ్‌లు ఆడిన కోహ్లి 2818 పరుగులు చేశాడు. 68.73 సగటుతో రన్స్ చేసిన కోహ్లి.. 11 సెంచరీలు, 10 అర్ధ సెంచరీలు సాధించాడు. వరుసగా రెండో ఏడాది మూడు డబుల్ సెంచరీలను కూడా తన ఖాతాలతో వేసుకున్నాడు.

అంతర్జాతీయ క్రికెట్లో ఒకే ఏడాది అత్యధిక పరుగులు చేసిన ఆటగాళ్ల జాబితాలో కోహ్లి మూడోస్థానంలో నిలిచాడు. 2014లో శ్రీలంక క్రికెటర్ సంగక్కర 53.11 సగటుతో 2868 పరుగులు చేసి అగ్రస్థానంలో ఉన్నాడు. 2005లో ఆసీస్ దిగ్గజ క్రికెటర్ రికీ పాంటింగ్ 56.66 యావరేజ్‌తో 2833 పరుగులు రాబట్టాడు.

విరాట్ మరో 51 పరుగులు చేసి ఉంటే.. సంగక్కర రికార్డును బ్రేక్ చేసి ఉండేవాడు. ఇదొక్కటే కాదు ఈ ఏడాది 11 సెంచరీలు చేసిన కోహ్లి ఒకే క్యాలెండర్ ఇయర్లో అత్యధిక శతకాలు బాదిన క్రికెటర్ల జాబితాలో రికీ పాంటింగ్‌తో కలిసి రెండో స్థానంలో నిలిచాడు. మరో సెంచరీ చేసి ఉంటే 12 శతకాలతో సచిన్ సరసన చేరేవాడు. కానీ శ్రీలంకపై వన్డే, టీ20ల సిరీస్‌ నుంచి కోహ్లి తప్పుకున్నాడు. విరాట్ విశ్రాంతి తీసుకోవాలని నిర్ణయించడంతో.. ఈ రెండు రికార్డులను చేజార్చుకున్నాడు.