Asia Cup 2022 కి విరాట్ కోహ్లీ రెడీ.. జిమ్‌లో శ్రమిస్తున్న మాజీ కెప్టెన్

ఆసియా కప్ 2022 (Asia Cup 2022) కోసం విరాట్ కోహ్లీ ప్రిపరేషన్స్‌ని స్టార్ట్ చేశాడు. ఇంగ్లాండ్ టూర్ తర్వాత భారత జట్టుకి దూరంగా ఉండిపోయిన విరాట్ కోహ్లీ (Virat Kohli).. పారిస్‌ టూర్‌లో ఫ్యామిలీతో కలిసి ఎంజాయ్ చేసి వచ్చాడు. ఈ నేపథ్యంలో వెస్టిండీస్‌తో వన్డే, టీ20 సిరీస్‌తో పాటు గురువారం నుంచి ప్రారంభంకానున్న జింబాబ్వే పర్యటనకీ ఈ మాజీ కెప్టెన్ దూరమయ్యాడు. అతనికి రెస్ట్ ఇచ్చినట్లు భారత సెలెక్టర్లు చెప్పుకొచ్చారు. యూఏఈ వేదికగా ఆగస్టు 27 నుంచి ఆసియా కప్ 2022 ప్రారంభంకానుంది. టీమిండియా తన మొదటి మ్యాచ్‌లోనే చిరకాల ప్రత్యర్థి పాకిస్థాన్‌తో ఆగస్టు 28న తలపడనుంది. దాంతో.. ఇప్పటికే భారత్ జట్టుని ప్రకటించిన సెలెక్టర్లు ఆ టీమ్‌లోకి విరాట్ కోహ్లీని ఎంపిక చేశారు. ఇంగ్లాండ్ టూర్ తర్వాత క్రికెట్‌కి దూరంగా ఉండిపోయిన కోహ్లీ ఎలాంటి మ్యాచ్‌ ప్రాక్టీస్ లేకుండానే ఆసియా కప్‌లో బరిలోకి దిగనున్నాడు.


విరాట్ కోహ్లీ ఆసియా కప్‌ 2022 ఆరంభంలోనే ఫామ్ అందుకుంటాడని బీసీసీఐ ప్రెసిడెంట్ సౌరవ్ గంగూలీ ఇప్పటికే ధీమా వ్యక్తం చేయగా.. కోహ్లీ కూడా పట్టుదలతో కనిపిస్తున్నాడు. టోర్నీకి ఇంకా సమయం ఉండటంతో ఫిట్‌నెస్‌ని మెరుగు పర్చుకునే పనిలో కోహ్లీ బిజీగా ఉన్నాడు. తాజాగా జిమ్‌లో విరాట్ కోహ్లీ హెవీ వెయిట్‌ని లిప్ట్ చేస్తూ కనిపించాడు.