హిట్ చేయబోయి పడిపోయిన కోహ్లి

భారత్ కెప్టెన్ విరాట్ కోహ్లి శుక్రవారం రాత్రి ఉప్పల్ గ్రౌండ్‌లో బంతిని హిట్ చేయబోయి పట్టుజారి కింద పడిపోయాడు. ఈ మైదానం ఔట్‌ఫీల్డ్ బురదగా ఉండటంతో భారత్, ఆస్ట్రేలియా మధ్య జరగాల్సిన మూడో టీ20 మ్యాచ్‌ని అంపైర్లు రద్దు చేసిన విషయం తెలిసిందే. మైదానంలో కొన్ని చోట్ల ఆటగాళ్లు అడుగుపెడితే.. షూ కొంచెం కూరుకుపోతుండటంతో మ్యాచ్ రద్దవబోతోందని భారత ఆటగాళ్లు ముందే ఊహించినట్లున్నారు. అందుకేనేమో.. అప్పటికే స్టేడియానికి చేరుకున్న అభిమానుల్ని అలరించే ప్రయత్నం చేశారు.

తొలుత ఓపెనర్ రోహిత్ శర్మ ఎడమచేతి వాటం బ్యాటింగ్‌తో కొన్ని బంతుల్ని హిట్ చేసి ఫ్యాన్స్‌ని ఖుషీ చేయగా.. అనంతరం కెప్టెన్ విరాట్ కోహ్లి కూడా ఇదే తరహాలో బ్యాటింగ్ చేశాడు. అయితే.. ఒక బంతిని శక్తికి మించి హిట్ చేస్తే ప్రయత్నంలో కోహ్లి పట్టుజారి కింద పడిపోయాడు. అనంతరం మాజీ కెప్టెన్ మహేంద్రసింగ్ ధోనీ బ్యాట్ తీసుకుని కొన్ని బంతులు ఎదుర్కోగా.. చివర్లో నయా ఆల్‌రౌండర్ హార్దిక్ పాండ్య వచ్చాడు. అతను లెఫ్ట్ హ్యాండ్‌తో కనీసం ఒక బంతిని కూడా కొట్టలేక ఆఖర్లో బౌల్డవడం టీమిండియా ఆటగాళ్లలో నవ్వులు పూయించింది. ఉప్పల్‌లో విజేత నిర్ణయాత్మక మ్యాచ్‌ని చూసేందుకు ఆశగా వచ్చిన అభిమానులు ఈ హిట్టింగ్ ప్రాక్టీస్‌ని కాసేపు ఎంజాయ్ చేశారు.