మూడో వన్డేలో శతకం బాదిన కోహ్లి

దక్షిణాఫ్రికా గడ్డపై భారత కెప్టెన్ విరాట్ కోహ్లి మరో శతకం బాదేశాడు. కేప్‌టౌన్ వేదికగా బుధవారం జరుగుతున్న మూడో వన్డేలో 119 బంతుల్లోనే 7 ఫోర్ల సాయంతో కోహ్లి 100 పరుగుల మైలురాయిని అందుకున్నాడు. వన్డే కెరీర్‌లో కోహ్లికి ఇది 34వ శతకం కాగా.. తాజా వన్డే సిరీస్‌లో రెండోది కావడం విశేషం. డర్బన్ వేదికగా జరిగిన తొలి వన్డేలోనూ ఈ కెప్టెన్ సెంచరీ బాదిన విషయం తెలిసిందే. తాజా శతకంతో భారత్ జట్టు 39.1 ఓవర్లు ముగిసే సమయానికి 214/4తో కొనసాగుతోంది.

టాస్ గెలిచిన దక్షిణాఫ్రికా జట్టు భారత్‌ని బ్యాటింగ్‌కి ఆహ్వానించింది. ఓపెనర్ రోహిత్ శర్మ (0) విఫలమైనా.. మరో ఓపెనర్ శిఖర్ ధావన్ (76: 63 బంతుల్లో 12x4)‌తో కలిసి విరాట్ కోహ్లి భారత స్కోరు బోర్డుని నడిపించాడు. ఈ ఇద్దరూ రెండో వికెట్‌కి 140 పరుగుల భాగస్వామ్యం నెలకొల్పారు. ఈ దశలో ధావన్ ఔటవగా.. తర్వాత వచ్చిన అజింక్య రహానె (11), హార్దిక్ పాండ్య (14) నిరాశపరిచినా.. కోహ్లి మాత్రం పట్టుదలతో బ్యాటింగ్ కొనసాగించి శతకం పూర్తి చేసుకున్నాడు.