కుంబ్లే రాజీనామా కోసం కోహ్లి డ్రామా..?

భారత ప్రధాన కోచ్ పదవి నుంచి అనిల్ కుంబ్లే తప్పుకోకపోతే.. తానే టీమిండియా కెప్టెన్సీ నుంచి తప్పుకుంటానని విరాట్ కోహ్లి బెదిరించాడట. ఛాంపియన్స్ ట్రోఫీకి కొద్దిరోజుల ముందు వీరిద్దరి మధ్య పెద్ద ఎత్తున మనస్పర్థలు తలెత్తిన విషయం తెలిసిందే. అయితే కుంబ్లే, కోహ్లి‌కి మధ్య రాజీ కుదుర్చేందుకు ప్రయత్నించిన క్రికెట్ సలహా కమిటీ సభ్యులు సచిన్ తెందుల్కర్, సౌరవ్ గంగూలీ, వీవీఎస్ లక్ష్మణ్‌లకి ఊహించని సమాధానం ఎదురైందట. ఒకవేళ జట్టు కోచ్‌గా కుంబ్లే కొనసాగితే తాను కెప్టెన్సీని వదులుకుంటానని కమిటీకి కోహ్లి చెప్పినట్లు వార్తలు వస్తున్నాయి.

రెండు రోజుల క్రితం ఏడాది కోచ్ ఒప్పందం ముగియడంతో అనిల్ కుంబ్లే రాజీనామా చేసిన విషయం తెలిసిందే. వాస్తవానికి గత ఆరునెలలుగా కోహ్లితో కుంబ్లేకి అసలు మాటలే లేవని ఇటీవల వెలుగులోకి వచ్చింది. ఛాంపియన్స్ ట్రోఫీ మ్యాచ్‌లకి ముందు ఆటగాళ్లకి సూచనలు ఇచ్చేందుకు కుంబ్లే వస్తే.. ‘జరిగింది చాలు’ అంటూ అవమానకరరీతిలో కోహ్లి మాట్లాడాడట. దీంతోనే వెస్టిండీస్ పర్యటన వరకు కొనసాగాలని తొలుత యోచించిన అనిల్ కుంబ్లే.. ఆ పర్యటనని రద్దు చేసుకుని రాజీనామా చేసినట్లు తెలుస్తోంది.