కివీస్‌పై కోహ్లి ఆ తప్పు చేయలేదు: గవాస్కర్

ఆస్ట్రేలియాతో వన్డే, టీ20 సిరీస్‌ల్లో చేసిన తప్పుల్ని భారత్ కెప్టెన్ విరాట్ కోహ్లి సరిదిద్దుకున్నాడని.. కివీస్‌తో తాజాగా జరుగుతున్న సిరీస్‌లో వాటిని పున‌రావృతం చేయడంలేదని దిగ్గజ క్రికెటర్ సునీల్ గవాస్కర్ ప్రశంసించాడు. ఆదివారం ముగిసిన మూడు వన్డేల సిరీస్‌లో కోహ్లి రెండు శతకాలు సాధించి ‘మ్యాన్ ఆఫ్ ద సిరీస్‌’గా నిలిచిన విషయం తెలిసిందే. బుధవారం నుంచి కివీస్‌తో మూడు టీ20ల సిరీస్‌ జరగనున్న నేపథ్యంలో మీడియాతో గవాస్కర్ మాట్లాడాడు.

‘విరాట్ కోహ్లి ఫామ్ అసాధారణం. సిరీస్‌లో కివీస్‌పై ఆధిపత్యం చెలాయిస్తూ సాధించిన రెండు శతకాలు అతని ఆత్మవిశ్వాసాన్ని ప్రస్ఫుటం చేస్తున్నాయి. ఈ సిరీస్‌ కంటే ముందు ఆస్ట్రేలియాతో జరిగిన సిరీస్‌లో కోహ్లి కొన్ని తప్పిదాలు చేశాడు. కానీ.. వేగంగా వాటి నుంచి పాఠాలు నేర్చుకున్నాడు. ముఖ్యంగా థర్డ్‌ మ్యాన్ దిశగా బంతిని నెట్టి పరుగులు రాబట్టాలనే ఆలోచనే చాలా వరకు అతను తగ్గించుకున్నాడు. ఎందుకంటే.. ఆస్ట్రేలియాతో ఐదు వన్డేల్లో రెండు సార్లు అలా ప్రయత్నిస్తూనే కోహ్లి వికెట్ చేజార్చుకున్నాడు’ అని గవాస్కర్ వివరించాడు. తొలి టీ20 మ్యాచ్ ఫిరోజ్ షా కోట్ల వేదికగా బుధవారం రాత్రి 7 గంటల నుంచి జరగనుంది.